اسلام آباد (این این آئی)پاکستان، سعودی عرب اور قطر سمیت 15ممالک نے اسرائیلی پارلیمنٹ کی جانب سے مغربی کنارے کے انضمام سے متعلق بلوں کی منظوری عالمی قوانین کی کھلی خلاف ورزی قرار دیدیا۔جاری مشترکہ اعلامئے میں کہا گیا ہے کہ اسرائیلی پارلیمنٹ کی جانب سے مغربی کنارے کے انضمام سے متعلق دو بلوں کی منظوری عالمی قوانین کی کھلی خلاف ورزی ہے ۔ مغربی کنارے میں خود ساختہ خود مختاری کا اسرائیلی اقدام غیر قانونی کسی صورت تسلیم نہیں کریں گے۔

مشترکہ اعلامیہ میں آزاد اور خود مختار فلسطینی ریاست کے قیام کی حمایت کا اعادہ کرتے ہوئے مطالبہ کیا گیا ہے کہ عالمی برادری صہیونی ریاست کو اشتعال انگیزی سے روکے ۔ عالمی عدالت انصاف نے بھی اسرائیلی بستیوں کی تعمیرکو کالعدم قرار دیا ہے، مشترکہ اعلامئے میں عالمی عدالت انصاف کی 22اکتوبر کی مشاورتی رائے کا بھی خیر مقدم کیا گیا ہے ۔اردن، انڈونیشیا، پاکستان، ترکیہ، جبوتی، سعودی عرب، عمان، گیمبیا، فلسطین، قطر، کویت، لیبیا، ملائیشیا،مصر،نائیجیریا،عرب لیگ اوراسلامی تعاون تنظیم بھی مشترکہ اعلامیہ کا حصہ ہے۔ دوسری جانب امریکی صدر ڈونلڈ ٹرمپ نے کہاہے کہ اسرائیل مغربی کنارے کے انضمام سے متعلق کوئی اقدام نہیں کرے گا، اس بارے میں فکرکرنے کی ضرورت نہیں، امن معاہدے پراچھی طرح کام جاری ہے۔