نئی دہلی (نیوز ڈیسک) بھارت کے دارالحکومت دہلی میں ایک المناک واقعہ اس وقت پیش آیا جب ایک شخص نے اپنے عاشقانہ تعلق کے تنازع پر حاملہ خاتون کو اس کے شوہر کے سامنے چھریوں کے وار سے قتل کر دیا۔ تاہم جوابی کارروائی میں شوہر نے حملہ آور کو قابو کر کے ہلاک کر دیا۔
بھارتی میڈیا رپورٹس کے مطابق یہ واقعہ وسطی دہلی کے رام نگر علاقے میں پیش آیا جہاں ناجائز تعلقات کے تنازع نے دو جانیں لے لیں۔ مقتولہ شالنی کی عمر 22 سال تھی، وہ دو بچیوں کی ماں اور حاملہ تھی۔
پولیس کے مطابق شالنی کا شوہر آکاش رکشہ چلاتا ہے، جو واقعے میں شدید زخمی ہوا اور اسپتال میں زیرِ علاج ہے۔ حملہ آور کی شناخت آشو عرف شیلندر کے نام سے ہوئی ہے، جو مقامی سطح پر جرائم پیشہ سرگرمیوں میں ملوث تھا۔
ذرائع کا کہنا ہے کہ آشو کا شالنی سے تعلق رہا تھا، اور وہ اس بات پر مشتعل تھا کہ شالنی نے دوبارہ اپنے شوہر کے ساتھ رہنا شروع کر دیا تھا۔ آشو کا دعویٰ تھا کہ شالنی کے پیٹ میں اس کا بچہ ہے۔
پولیس کے مطابق واقعہ اُس وقت پیش آیا جب شالنی اپنے شوہر کے ہمراہ اپنی ماں سے ملنے قطب روڈ گئی ہوئی تھی۔ اسی دوران آشو موقع پر پہنچا اور آکاش پر چاقو سے حملہ کرنے کی کوشش کی۔ آکاش نے خود کو بچا لیا، جس پر حملہ آور نے شالنی پر کئی وار کر دیے۔
آکاش نے بیوی کو بچانے کی کوشش کی لیکن وہ بھی زخمی ہو گیا۔ اس کے باوجود اُس نے بہادری دکھاتے ہوئے آشو سے چاقو چھین لیا اور جوابی وار کر کے اسے ہلاک کر دیا۔
پولیس کے مطابق شالنی اور آشو دونوں کو اسپتال منتقل کیا گیا، جہاں ڈاکٹروں نے ان کی موت کی تصدیق کی، جبکہ آکاش کی حالت تشویشناک بتائی جا رہی ہے۔
واقعے کے بعد پولیس نے مقتولہ شالنی کی والدہ شیلا کے بیان پر قتل اور اقدامِ قتل کا مقدمہ درج کر لیا ہے۔ تحقیقات جاری ہیں۔
