اسلام آباد (نیوز ڈیسک) جاپان میں پولیس نے ایک 75 سالہ معمر خاتون کو اس وقت حراست میں لیا جب اس نے اعتراف کیا کہ وہ اپنی بیٹی کی لاش تقریباً دو دہائیوں سے ڈیپ فریزر میں رکھے ہوئے تھی۔
غیر ملکی میڈیا کے مطابق شمال مشرقی ٹوکیو کے علاقے ایباراکی میں خاتون کے گھر سے ایک بالغ عورت کی لاش برآمد کی گئی۔ پولیس ترجمان کا کہنا ہے کہ گرفتار خاتون کی شناخت کیکو موری کے نام سے ہوئی ہے جس نے دعویٰ کیا کہ فریزر سے ملنے والی لاش اس کی بیٹی ماکیکو کی ہے، جس کی پیدائش 1975 میں ہوئی تھی۔ اگر وہ زندہ ہوتی تو اس وقت اس کی عمر 49 سے 50 برس کے درمیان ہوتی۔
پولیس کا کہنا ہے کہ لاش گلنے کے مراحل میں تھی اور موت کی اصل وجہ جاننے کے لیے پوسٹ مارٹم کیا جائے گا۔ اطلاعات کے مطابق موری خود ایک رشتہ دار کے ساتھ پولیس اسٹیشن پہنچی اور بتایا کہ اس کے گھر میں بیٹی کی لاش فریزر میں موجود ہے۔ جب تفتیش کار گھر گئے تو لاش کو فریزر میں الٹی حالت میں گھٹنوں کے بل جھکا ہوا پایا۔
تحقیقات میں معلوم ہوا کہ موری نے لاش سے پھیلتی بدبو کی وجہ سے ایک فریزر خریدا اور ماکیکو کی باقیات اس میں محفوظ کر دیں۔ پولیس نے خاتون کو لاش چھپانے اور ٹھکانے لگانے کے الزام میں گرفتار کر لیا ہے۔
اہلکاروں کے مطابق موری کے کئی بچے ہیں لیکن یہ واضح نہیں کہ انہوں نے ماکیکو کی گمشدگی پر کیا ردعمل دیا۔ مزید یہ کہ حالیہ دنوں میں موری کے شوہر کے انتقال کے بعد وہ تنہا زندگی گزار رہی تھی۔
