اسلام آباد (نیوز ڈیسک) چین کے صوبے ژیجیانگ کے علاقے سانگنان میں ایک دلخراش مگر حیران کن واقعہ پیش آیا، جہاں دو سالہ بچہ اپنی ماں کے انتقال کے بعد کئی دن اکیلا رہنے کے باوجود زندہ سلامت پایا گیا۔اطلاعات کے مطابق بچے کی 28 سالہ ماں، ژینگ یو، اچانک چل بسی تھیں۔ ان کے ایک قریبی دوست نے بار بار رابطہ کرنے کی کوشش کی مگر ناکام رہا۔ بالآخر اس نے پولیس کو اطلاع دی۔ پولیس اہلکار جب فلیٹ میں داخل ہوئے تو وہاں ژینگ کی لاش موجود تھی جبکہ ان کا کمسن بیٹا کئی روز سے تنہا زندگی گزار رہا تھا۔

تحقیقات میں پتا چلا کہ بچہ گھر میں موجود جیلی، کدو، ہربل چائے اور دیگر اشیائے خورونوش کھا کر زندہ رہا۔ تاہم گھر کے مختلف حصے، خاص طور پر بیڈروم، کچرے سے بھرے ہوئے تھے۔ بچہ اس دوران صرف ایک ڈائپر اور شرٹ پہنے حالتِ گندگی میں پایا گیا۔قریبی رہائشی خاتون بچے کو فوراً اپنے ساتھ لے گئیں، اسے صاف ستھرا کیا، کھانا کھلایا اور نئے کپڑے پہنائے، جس کے بعد اسپتال منتقل کر دیا گیا۔ خوش قسمتی سے میڈیکل معائنے میں ثابت ہوا کہ بچے کو کوئی نقصان نہیں پہنچا اور اس کی صحت تسلی بخش ہے۔ذرائع کے مطابق ژینگ کافی عرصے سے بیمار رہتی تھیں اور سوشل میڈیا پر بلڈ پریشر اور شوگر کے مسائل کے بارے میں لکھتی رہتی تھیں۔ ان کے قریبی افراد کا خیال ہے کہ ان کی موت کسی اچانک بیماری کے باعث ہوئی۔ژینگ اپنے بیٹے کی پرورش اکیلے کر رہی تھیں، کیونکہ شوہر سے تعلقات خراب ہونے کے بعد دونوں میں فروری 2025 کے بعد کوئی رابطہ نہیں رہا۔ اب بچے کی دیکھ بھال اس کے والد کر رہے ہیں۔