اسلام آباد (نیوز ڈیسک) طالبان حکومت نے بھارت کے سینیئر سفارتکار ہریش کمار کو افغانستان سے ملک بدر کر دیا۔افغان میڈیا کی رپورٹس کے مطابق ہریش کمار پر یہ الزام عائد کیا گیا ہے کہ وہ طالبان مخالف گروہوں سے ملاقاتیں کر رہے تھے اور انہیں منظم کرنے کی کوشش میں مصروف تھے۔ذرائع نے بتایا کہ طالبان حکام نے ہریش کمار کو “ناپسندیدہ شخصیت” قرار دیتے ہوئے 17 اگست تک کابل چھوڑنے کا حکم دیا۔

مزید یہ بھی بتایا گیا ہے کہ ہریش کمار، سابق افغان حکومت کے خاتمے کے بعد سے کابل میں بھارتی سفارتکار کے ساتھ ساتھ انٹیلی جنس افسر کی حیثیت سے تعینات تھے۔اطلاعات کے مطابق 16 اگست کو طالبان نمائندوں نے بھارتی سفارتخانے کے عملے کو طلب کر کے کمار کی ملک بدری سے آگاہ کیا، جس کے بعد وہ اگلے روز دہلی روانہ ہو گئے۔اس معاملے پر بھارتی سفارتخانے کی جانب سے تاحال کوئی ردِعمل یا وضاحت سامنے نہیں آئی۔