اسلام آباد (نیوز ڈیسک) امریکی صدر ڈونلڈ ٹرمپ نے یورپی یونین سے بھارت اور چین پر 100 فیصد ٹیرف عائد کرنے کا مطالبہ کیا ہے۔

خبر ایجنسی کے مطابق امریکی صدر ڈونلڈ ٹرمپ نے یورپی یونین سے بڑا مطالبہ کر دیا ہے، صدر ٹرمپ نے کہا کہ یورپی یونین چین اور بھارت پر 100 فیصد ٹیرف عائد کرے۔

امریکی صدر نے کہا کہ 100 فیصد ٹیرف کے ذریعے روس پر یوکرین جنگ ختم کرنے کا مشترکہ دباؤ ڈالیں گے، امریکی صدر نے یہ مطالبہ امریکی و یورپی حکام کے درمیان جاری ٹیلیفونک اجلاس میں کیا۔

اجلاس میں روس پر معاشی دباؤ بڑھانے کے مختلف طریقوں پر غور کیا گیا، صدر ٹرمپ نے کہا سب مل کر محصولات لگائیں تا کہ چین اور بھارت روسی تیل خریدنا بند کریں۔

امریکی صدر ٹرمپ نے کہا کہ روسی تیل کے لیے زیادہ متبادل منڈیاں موجود نہیں ہیں، یورپی یونین بھارت اور چین پر محصولات لگائے گی تو واشنگٹن بھی ایسے اقدامات کرے گا۔