برسلز (این این آئی)یورپی یونین نے سیلاب متاثرین کے لیے فوری طور پر 35 کروڑ روپے ہنگامی امداد کا اعلان کیا ہے۔ ایک بیان میں یورپی یونین نے کہاکہ سیلاب متاثرین کی فوری ضروریات کے لیے 35 کروڑ روپے کی امداد دے رہے ہیں، پاکستان میں تباہ کن فلیش فلڈز سے متعدد افراد جاں بحق اور لاپتہ ہیں، مون سون بارشوں کے باعث آنے والے فلیش فلڈز سے بڑے پیمانے پر تباہی ہوئی۔ یورپی یونین کے مطابق جاں بحق افراد کے لواحقین اور متاثرہ خاندانوں سے دلی ہمدردی ہے۔

بیان میں کہا گیا کہ امداد قابلِ اعتماد انسانی ہمدردی کی تنظیموں کے ذریعے فراہم کی جائے گی، امداد میں جان بچانے والی ہیلتھ سروسز شامل ہوں گی۔ یورپی یونین نے کہا کہ سب سے زیادہ متاثرہ اور کمزور افراد کے لیے کیش معاونت فراہم کی جائے گی،یورپی یونین مشکل وقت میں پاکستانی عوام کے ساتھ کھڑی ہے۔