اسلام آباد (نیوز ڈیسک) گلگت بلتستان کے علاقے ہڈور گاؤں کے قریب پاک فوج کا ہیلی کاپٹر حادثے کا شکار ہو گیا۔پاک فوج کے شعبہ تعلقات عامہ (آئی ایس پی آر) کے مطابق، یہ واقعہ آج صبح تقریباً 10 بجے اس وقت پیش آیا جب ہیلی کاپٹر معمول کی تربیتی پرواز پر تھا۔آئی ایس پی آر کے مطابق، حادثے کے نتیجے میں 2 میجرز سمیت 5 اہلکار شہید ہوئے۔ شہدا میں میجر عاطف، میجر فیصل، فلائٹ انجینئر نائب صوبیدار مقبول، کریو چیف حوالدار جہانگیر اور کریو چیف نائیک عامر شامل ہیں۔

ترجمان کے مطابق، ابتدائی تحقیقات سے معلوم ہوا ہے کہ ہیلی کاپٹر کو یہ حادثہ فنی خرابی کے باعث پیش آیا۔ تربیتی پروازیں آرمی ایوی ایشن کی معمول کی سرگرمیوں کا حصہ ہیں۔دوسری جانب، وزیراعظم شہباز شریف نے حادثے پر گہرے دکھ کا اظہار کرتے ہوئے شہدا کے بلند درجات اور ان کے اہل خانہ کے لیے صبر جمیل کی دعا کی۔