اسلام آباد (نیوز ڈیسک)بھارتی ریاست اتر پردیش کے شہر کانپور میں گوگل میپس کی سروے ٹیم کو مقامی لوگوں نے چور سمجھ کر تشدد کا نشانہ بنایا۔بھارتی میڈیا رپورٹس کے مطابق یہ واقعہ اس وقت پیش آیا جب ٹیم رات کے وقت کیمرہ نصب گاڑی کے ذریعے علاقے کا سروے کر رہی تھی۔ رہائشیوں نے مشتبہ سرگرمی دیکھ کر گاڑی کو گھیر لیا اور ٹیم پر حملہ کر دیا۔علاقہ مکینوں کا کہنا تھا کہ گزشتہ کچھ ہفتوں میں چوری کی متعدد وارداتیں ہو چکی ہیں، جن میں چور عموماً گاڑیوں پر آ کر واردات کرتے ہیں۔ 28 اگست کو پیش آنے والے اس واقعے سے قبل سروے ٹیم نے مقامی پولیس یا رہائشیوں کو کوئی اطلاع نہیں دی تھی، جس کے باعث شبہ پیدا ہوا۔

گوگل میپس ٹیم کے انچارج سندیپ کے مطابق یہ واقعہ مکمل طور پر غلط فہمی کا نتیجہ تھا۔ انہوں نے کہا کہ ٹیم کے پاس مرکزی اور ریاستی حکومت کے جاری کردہ اجازت نامے موجود تھے، لیکن اگر مقامی لوگ ہمارے دستاویزات دیکھ لیتے تو یہ مسئلہ پیدا نہ ہوتا۔پولیس افسر کرشن کانت یادو نے بتایا کہ ٹیم نے سروے سے پہلے مقامی انتظامیہ کو آگاہ نہیں کیا تھا۔ پولیس کی جانب سے ٹیم کو ہدایت دی گئی ہے کہ آئندہ دیہی یا نیم شہری علاقوں میں سروے کے دوران مقامی پولیس یا گاؤں کے سربراہ کو پیشگی اطلاع دی جائے۔