اسلام آ با د (نیوز ڈیسک)امریکی صدر ڈونلڈ ٹرمپ نے ایک بار پھر پاکستان اور بھارت کے درمیان ممکنہ جنگ کا حوالہ دیتے ہوئے کہا ہے کہ انہوں نے دونوں ممالک کے درمیان کشیدگی کم کرانے میں کردار ادا کیا تھا۔وائٹ ہاؤس میں میڈیا سے گفتگو کرتے ہوئے ٹرمپ کا کہنا تھا کہ انہوں نے متعدد ایسے تنازعات ختم کروائے جنہیں حل کرنا ناممکن سمجھا جا رہا تھا۔ان کے مطابق، انہی تنازعات میں ایک پاکستان اور بھارت کے درمیان ہونے والا وہ تصادم بھی شامل تھا جو ایٹمی جنگ میں تبدیل ہونے کے قریب تھا۔

ٹرمپ نے دعویٰ کیا کہ اس دوران سات طیارے تباہ ہو چکے تھے اور صورتحال مزید بگڑ رہی تھی۔ انہوں نے کہا کہ انہوں نے تجارتی دباؤ ڈالتے ہوئے دونوں ممالک کو جنگ بندی پر مجبور کیا۔ ان کا کہنا تھا کہ اگر جنگ نہ رکی تو انہوں نے تجارتی تعلقات منقطع کرنے کی دھمکی دی، جس کے نتیجے میں 24 گھنٹوں کے اندر تنازع ختم ہوگیا۔یہ بھی یاد رہے کہ ڈونلڈ ٹرمپ اس سے قبل 30 سے زائد مرتبہ پاک بھارت جنگ بندی کا کریڈٹ لے چکے ہیں، جبکہ اس واقعے میں تباہ ہونے والے طیاروں کی تعداد وہ مختلف مواقع پر 5 اور کبھی 6 بتاتے رہے ہیں۔