اسلام آباد (نیوز ڈیسک)ددبئی پولیس نے ڈھائی کروڑ ڈالر مالیت کے نایاب پنک ڈائمنڈ کی چوری اور اسمگلنگ کی کوشش ناکام بنا دی۔اماراتی خبر رساں ادارے کے مطابق یہ کارروائی ’’پنک ڈائمنڈ آپریشن‘‘ کے نام سے کی گئی جس میں ایک بین الاقوامی گروہ کو گرفتار کیا گیا۔ رپورٹ کے مطابق یہ گروہ تقریباً ایک سال سے اس بیش قیمت ہیرے کو چرانے کی منصوبہ بندی میں مصروف تھا۔
تفتیشی ذرائع کا کہنا ہے کہ ملزمان نے پہلے ہیرے کے مالک تک رسائی حاصل کی اور خود کو ایک دولت مند خریدار کا نمائندہ ظاہر کر کے اعتماد جیتنے کی کوشش کی۔ اس مقصد کے لیے انہوں نے مہنگی گاڑیاں کرائے پر لیں، دبئی کے لگژری ہوٹلوں میں ملاقاتیں کیں اور یہاں تک کہ ایک معروف ماہرِ جواہرات کی خدمات بھی حاصل کیں تاکہ اپنی سنجیدگی ظاہر کی جا سکے۔ان ہتھکنڈوں کے بعد جیولر کو قائل کیا گیا کہ وہ ہیرا اپنی دکان سے نکال کر نجی ملاقات میں لے آئے۔
اسی دوران ملزمان نے موقع پا کر ہیرا چرا لیا اور مختلف راستوں سے فرار ہو گئے۔ واردات کے فوری بعد پولیس نے خصوصی ٹیم تشکیل دی اور جدید ٹیکنالوجی اور نگرانی کے ذریعے تینوں مشتبہ افراد کی شناخت کر لی، جن کا تعلق مختلف ایشیائی ممالک سے بتایا جاتا ہے۔پولیس نے بیک وقت کارروائی کرتے ہوئے ملزمان کو گرفتار کر لیا اور ہیرا بھی برآمد کر لیا، جسے وہ ایک چھوٹے ریفریجریٹر میں چھپا کر ایشیائی ملک اسمگل کرنے کی تیاری میں تھے۔حکام کے مطابق پولیس نے شکایت ملنے کے صرف آٹھ گھنٹے کے اندر کارروائی مکمل کر کے نہ صرف تمام ملزمان کو گرفتار کیا بلکہ قیمتی پنک ڈائمنڈ کو بھی بحفاظت بازیاب کر لیا۔
