اسلام آبا د(نیوز ڈیسک) چین نے بھارتی فائبر آپٹک مصنوعات پر عائد اینٹی ڈمپنگ ٹیرف ختم کرنے کے بجائے اسے برقرار رکھنے کا اعلان کیا ہے۔ چینی وزارتِ تجارت کے مطابق بھارت سے درآمد ہونے والے سنگل موڈ آپٹیکل فائبر پر یہ ٹیرف بدستور نافذ رہے گا، جس کی زیادہ سے زیادہ شرح 30.6 فیصد مقرر ہے۔ یہ محصول پہلی بار 2014ء میں لگایا گیا تھا، بعد ازاں اگست 2020ء میں اس میں توسیع کی گئی تھی۔

ٹرمپ کا بھارت اور دیگر ممالک کے خلاف مزید اقدامات کا عندیہ

دوسری جانب سابق امریکی صدر ڈونلڈ ٹرمپ نے کہا ہے کہ بھارت پر لگایا گیا ٹیرف محض شروعات ہے اور آئندہ مزید تجارتی اقدامات دیکھنے کو ملیں گے۔ ان کے مطابق بھارت پر 50 فیصد ٹیرف عائد کیا جا چکا ہے، جبکہ اگر بھارت یا دیگر ممالک نے روس سے تیل خریدنا بند نہ کیا تو مزید سخت پابندیاں لگائی جائیں گی۔ ٹرمپ نے یہ بھی عندیہ دیا کہ چین پر بھی ٹیرف بڑھایا جا سکتا ہے، خاص طور پر چپس اور سیمی کنڈکٹرز پر 100 فیصد تک ڈیوٹی لگائی جا سکتی ہے تاکہ امریکی مصنوعات کو عالمی سطح پر برتری حاصل ہو۔

انہوں نے کہا کہ ایپل سمیت کئی امریکی کمپنیاں پیداوار واپس امریکہ منتقل کر رہی ہیں اور جو کمپنیاں اندرونِ ملک مینوفیکچرنگ کریں گی، ان پر اضافی فیس عائد نہیں ہوگی۔ ٹرمپ کے بقول، ایک سال قبل امریکہ کو دیوالیہ ہونے کے خدشات لاحق تھے لیکن آج اسٹاک مارکیٹ تاریخ کی بلند ترین سطح پر ہے۔

ٹرمپ نے دعویٰ کیا کہ ایران کی جوہری صلاحیت پہلے ہی بی-ٹو بمبار طیاروں کے ذریعے نشانہ بنا کر ختم کر دی گئی ہے، اور اگر تہران نے دوبارہ جوہری پروگرام شروع کیا تو امریکہ فوجی کارروائی کرے گا۔