اسلام آباد (نیوز ڈیسک) سعودی عرب میں ایک افسوسناک واقعہ پیش آیا جہاں ایک غیر ملکی معالج اور ان کی اہلیہ گاڑی میں دم گھٹنے کے باعث زندگی کی بازی ہار گئے۔تفصیلات کے مطابق، ڈاکٹر عبدالعزیز ادریس، جو شقرا ہسپتال میں بطور سرجن فرائض انجام دے رہے تھے، اور ان کی اہلیہ ڈاکٹر اسما احمد، جو شقرا کے ایک طبی مرکز سے وابستہ تھیں، ریاض میں ایک دن کے قیام پر تھے۔ دونوں ایک ریستوران کے باہر اپنی گاڑی میں کھانے کا آرڈر ملنے کا انتظار کر رہے تھے کہ گاڑی کے ایئرکنڈیشنر سے زہریلی گیس کے اخراج کے باعث دم گھٹنے کا واقعہ پیش آیا، جس کے نتیجے میں دونوں موقع پر جاں بحق ہو گئے۔

اس سانحے کے بعد شقرا گورنریٹ کے ایک ریسٹ ہاؤس میں تعزیتی تقریب منعقد ہوئی، جس میں ان کے ساتھی ڈاکٹروں اور دوستوں نے شرکت کی۔ شرکا نے مرحومین کے اخلاق، ان کے پیشہ ورانہ جذبے اور مریضوں کے ساتھ ہمدردانہ رویے کو سراہا۔دوسری جانب، سعودی شہر طائف میں بھی ایک حادثہ پیش آیا جہاں گرین ماؤنٹین تفریحی پارک میں جھولا ٹوٹنے کے باعث 23 افراد زخمی ہو گئے۔ حکام نے واقعے کی مکمل تحقیقات کا آغاز کر دیا ہے۔ اطلاعات کے مطابق، بعض زخمیوں کی حالت تشویشناک ہے، جب کہ حادثہ جھولے کے پائپ کے ٹوٹنے کے باعث پیش آیا۔