اسلام آباد (نیوز ڈیسک) بھارتی شہر ناگپور میں پولیس نے ایک ایسی خاتون کو گرفتار کیا ہے جو اب تک آٹھ مختلف مردوں سے شادی کرکے ان سے لاکھوں روپے وصول کر چکی ہے۔ پولیس نے نویں شادی کی کوشش کے دوران اسے موقع پر ہی دھر لیا۔مقامی میڈیا رپورٹس کے مطابق مذکورہ خاتون ایک اسکول میں تدریسی فرائض انجام دیتی ہے۔ 29 جولائی کو جب وہ ایک ہوٹل میں اپنے اگلے “شوہر” سے ملاقات کے لیے پہنچی تو پولیس نے خفیہ اطلاع پر کارروائی کرتے ہوئے اسے گرفتار کر لیا۔

تحقیقات سے معلوم ہوا کہ وہ خواتین و مردوں کی شادی سے متعلق ویب سائٹس اور سوشل میڈیا پلیٹ فارمز خصوصاً فیس بک کے ذریعے امیر اور بعض اوقات شادی شدہ مردوں سے تعلق بناتی تھی۔ وہ خود کو طلاق یافتہ اور ایک بچے کی ماں ظاہر کرکے جذباتی ہمدردی حاصل کرتی اور پھر شادی کے بعد مالی فوائد سمیٹ کر غائب ہو جاتی۔متاثرہ افراد میں سے ایک شخص نے بتایا کہ خاتون نے شادی کے بعد اسے قائل کیا کہ کچھ مالی مسائل ہیں اور اس بہانے بڑی رقم لے اڑی۔پولیس کی جانب سے مقدمہ درج کر کے مزید متاثرین سے بھی رابطہ کیا جا رہا ہے تاکہ کیس کو منطقی انجام تک پہنچایا جا سکے۔