اسلام آباد (نیوز ڈیسک)بھارتی ریاست بہار کے ضلع گیا میں ہوم گارڈ کی بھرتی کے لیے آئی 26 سالہ خاتون کے ساتھ مبینہ طور پر ایمبولینس میں اجتماعی زیادتی کا دل دہلا دینے والا واقعہ سامنے آیا ہے۔پولیس کے مطابق، متاثرہ خاتون ٹیسٹ کے دوران بے ہوش ہو گئی تھی، جس پر طبی امداد کے لیے اُسے ایک ایمبولینس کے ذریعے اسپتال منتقل کیا جا رہا تھا۔ لیکن راستے میں خاتون کے ساتھ ایمبولینس میں موجود افراد نے مبینہ طور پر زیادتی کی۔
متاثرہ لڑکی کا کہنا ہے کہ اسے ہوش نہ ہونے کی حالت میں نشانہ بنایا گیا، اور ہوش میں آنے پر جب اسے حالات کا ادراک ہوا تو اس نے فوری طور پر اسپتال انتظامیہ اور پولیس کو تمام صورتِ حال سے آگاہ کیا۔پولیس کو شکایت موصول ہونے کے بعد واقعے کی تفتیش شروع کر دی گئی ہے۔ اب تک کی تحقیقات کے دوران پولیس نے ایمبولینس کے ڈرائیور ونے کمار اور ٹیکنیشن اجیت کمار کو گرفتار کر لیا ہے۔ پولیس کا کہنا ہے کہ واقعے کے وقت اور ایمبولینس کی نقل و حرکت کی تصدیق سی سی ٹی وی فوٹیج کی مدد سے کر لی گئی ہے۔حکام نے یقین دہانی کرائی ہے کہ متاثرہ خاتون کو انصاف دلانے کے لیے تحقیقات کو ترجیحی بنیادوں پر مکمل کیا جائے گا اور ذمہ داروں کو قانون کے مطابق سزا دی جائے گی۔
