برمنگھم(این این آئی) ورلڈ چیمپئن شپ آف لیجنڈز کے تحت پاکستان اور بھارت کے درمیان ہونے والا میچ بھارتی کھلاڑیوں کی ہٹ دھرمی کے باعث منسوخ کردیا گیا۔کرکٹ سے ریٹائرمنٹ کے بعد بھی شاہد آفریدی ”بوم بوم”بھارتیوں کے اعصاب پر سوار ہے، بھارتی کرکٹرز کی پاکستانی لیجنڈزسے نفرت کھل کر سامنے آگئی۔برمنگھم میں ہونے والا پاک بھارت مقابلہ بھارتی کھلاڑیوں کی ہٹ دھرمی کی وجہ سے منسوخ ہوا، ورلڈ چیمپئن شپ آف لیجنڈز کا یہ میچ شیڈول تھا۔

اس حوالے سے ذرائع نے انکشاف کیا ہے کہ شاہد آفریدی کے ڈر سے 5 بھارتی کھلاڑیوں نے میچ کھیلنے سے انکار کردیا تھا۔جن بھارتی کھلاڑیوں نے کھیلنے سے انکار کیا ان میں یوسف پٹھان، عرفان پٹھان، ہربھجن سنگھ، سریش رائنا، یووراج سنگھ شامل ہیں۔بھارتی کھلاڑیوں کا کہنا تھا کہ اگر شاہد آفریدی نے پاکستان کی طرف سے کھیلا تو ہم یہ میچ نہیں کھیلیں گے، ورلڈ چیمپئن شپ آف لیجنڈز میں پاک بھارت مقابلہ دیکھنے کیلئے شائقین کرکٹ بے تاب تھے۔یاد رہے کہ گزشتہ روز پاکستان چیمپئنز نے انگلینڈ چیمپئنز کو 5 رنز سے شکست دے کر ایونٹ کا فاتحانہ آغاز کیا، دوسرے میچ میں جنوبی افریقا چیمپئنز نے ویسٹ انڈیز چیمپئنز کو بال آؤٹ پر شکست دی۔