اسلام آباد (نیوز ڈیسک) اگر آپ ہارٹ اٹیک اور فالج جیسے مہلک امراض سے محفوظ رہنا چاہتے ہیں تو اس کا ایک سادہ مگر مؤثر حل روزمرہ خوراک میں چھپا ہے: سبز پتوں والی سبزیوں کا باقاعدہ استعمال۔ایڈتھ کوون یونیورسٹی، ویسٹرن آسٹریلیا یونیورسٹی اور ڈینش کینسر انسٹیٹیوٹ کی جانب سے کی جانے والی ایک حالیہ مشترکہ تحقیق کے مطابق پالک، ساگ اور دیگر سبز پتوں والی سبزیاں دل کو صحت مند رکھنے میں اہم کردار ادا کرتی ہیں۔

اس تحقیق میں واضح کیا گیا ہے کہ ان سبزیوں میں وٹامن K1 کی وافر مقدار پائی جاتی ہے، جو دل کی بیماریوں سے بچاؤ میں مددگار ثابت ہوتی ہے۔ ماہرین کے مطابق دنیا بھر میں سب سے زیادہ اموات کی وجہ بننے والے امراض، یعنی دل کی بیماریاں، وٹامن K1 کے ذریعے کسی حد تک روکی جا سکتی ہیں۔ماہرین کا کہنا ہے کہ وٹامن K1 خون کی شریانوں میں تنگی پیدا ہونے کے عمل کو کم کرتا ہے، جس سے دل کے دورے اور فالج جیسے خطرناک نتائج سے بچا جا سکتا ہے۔تحقیق میں بتایا گیا ہے کہ روزانہ تقریباً ڈیڑھ کپ سبز پتوں والی سبزیاں کھانے سے نہ صرف وٹامن K1 کی ضروری مقدار حاصل کی جا سکتی ہے، بلکہ یہ ہڈیوں اور عضلات کی صحت کے لیے بھی فائدہ مند ہوتی ہیں۔محققین کا یہ بھی کہنا تھا کہ خوراک اور صحت کا گہرا تعلق ہے، اور سبز پتوں والی سبزیوں جیسی قدرتی غذائیں دل کی بیماریوں کے خطرے کو کم کرنے میں نمایاں اثر رکھتی ہیں۔یہ تحقیق “یورپین جرنل آف نیوٹریشن” میں شائع ہوئی ہے اور اس میں غذائی احتیاط کو دل کی صحت کا اہم ستون قرار دیا گیا ہے۔