اسلا م آباد (نیوز ڈیسک)بالی ووڈ کے معروف اداکار اور کرکٹ فرنچائزز کے مالک شاہ رخ خان نے کیریبین پریمیئر لیگ (سی پی ایل) میں اپنی ٹیم “ٹرنباگو نائٹ رائیڈرز” کے لیے دو پاکستانی کرکٹرز کے ساتھ معاہدہ کر لیا ہے۔بھارتی میڈیا رپورٹس کے مطابق ٹی کے آر کی ٹیم نے جن دو پاکستانی کھلاڑیوں کو رواں سیزن کے لیے منتخب کیا ہے ان میں فاسٹ بولر محمد عامر اور آف اسپنر محمد عثمان طارق شامل ہیں۔محمد عامر پہلے بھی چار سیزنز میں سی پی ایل کا حصہ رہ چکے ہیں اور انہوں نے اب تک لیگ میں 39 میچز کھیلتے ہوئے 18.09 کی اوسط سے 51 وکٹیں حاصل کی ہیں۔

عامر اپنی تیز رفتار سوئنگ اور خاص طور پر ڈیتھ اوورز میں نپی تلی بولنگ کے لیے جانے جاتے ہیں، اور توقع ہے کہ وہ اس سیزن میں ٹیم کی بولنگ لائن کو مزید طاقتور بنانے میں اہم کردار ادا کریں گے۔دوسری جانب محمد عثمان طارق ویسٹ انڈیز میں اپنا پہلا ٹی ٹوئنٹی لیگ سیزن کھیلیں گے۔ وہ پاکستان سپر لیگ 2025 میں کوئٹہ گلیڈی ایٹرز کی جانب سے کھیل چکے ہیں، جہاں انہوں نے صرف پانچ میچز میں 10 وکٹیں لے کر اپنی صلاحیتوں کا لوہا منوایا تھا۔یہ بات بھی قابل ذکر ہے کہ شاہ رخ خان اداکاری کے ساتھ ساتھ کھیلوں کے میدان میں بھی بھرپور دلچسپی رکھتے ہیں اور ان کے پاس دنیا بھر میں متعدد کرکٹ ٹیموں کی ملکیت ہے۔ٹرنباگو نائٹ رائیڈرز سی پی ایل کی سب سے کامیاب ٹیموں میں شمار ہوتی ہے، جو اب تک چار بار چیمپئن بن چکی ہے۔واضح رہے کہ محمد عامر سمیت تمام پاکستانی کھلاڑیوں پر انڈین پریمیئر لیگ (آئی پی ایل) میں شرکت پر اب بھی پابندی برقرار ہے۔