دوحہ(این این آئی)کئی عرب ملکوں نے قطر میں امریکی العدید ایئر بیس پر ایرانی حملے کی مذمت کی ہے۔میڈیارپورٹس کے مطابق قطری وزارت دفاع نے ایک بیان میں اعلان کیا کہ قطری فضائی دفاع نے العدید ایئر بیس کو نشانہ بنانے والے میزائل حملے کو کامیابی کے ساتھ ناکام بنا دیا۔سعودی وزارت خارجہ کے ایک بیان کے مطابق سعودی عرب نے ایران کی جانب سے قطر کے خلاف شروع کی گئی جارحیت کی مذمت کی اور کہا ہے یہ جارحیت بین الاقوامی قانون اور اچھی ہمسائیگی کے اصولوں کی کھلی خلاف ورزی ہے۔ یہ ناقابل قبول ہے اور اسے کسی بھی صورت میں جائز قرار نہیں دیا جا سکتا۔مصر نے بھی قطر پر ایرانی حملوں کی شدید مذمت کی اور ان حملوں کو قطر کی خودمختاری کی خلاف ورزی، اس کی علاقائی سالمیت کے لیے خطرہ اور بین الاقوامی قانون اور اقوام متحدہ کے چارٹر کی خلاف ورزی قرار دیا۔
متحدہ عرب امارات نے ایرانی پاسداران انقلاب کی جانب سے قطر میں العدید ایئر بیس کو نشانہ بنانے کی شدید الفاظ میں مذمت کرتے ہوئے اسے قطر کی خودمختاری اور فضائی حدود کی کھلی خلاف ورزی اور بین الاقوامی قانون اور اقوام متحدہ کے چارٹر کی صریح خلاف ورزی قرار دیا۔بحرین نے اپنی طرف سے اپنی سرزمین پر ایرانی حملے کے بعد قطر کے لیے اپنی مکمل حمایت کا اعادہ کیا۔ عمانی وزارت خارجہ کے ایک سرکاری ترجمان نے سلطنت عمان کی جانب سے جاری علاقائی کشیدگی کی مذمت کا اظہار کیا۔ کویت نے ایرانی پاسداران انقلاب کی جانب سے قطر میں العدید ایئر بیس کو نشانہ بنانے والے حملوں کی شدید مذمت کی۔عراقی وزارت خارجہ کے ایک بیان میں کہا گیا ہے کہ وزارت خارجہ خطے میں خطرناک اور تیزی سے بڑھتی ہوئی کشیدگی پر گہری تشویش رکھتی ہے۔ اردن نے بھی قطر کے خلاف ایران کی طرف سے شروع کی گئی جارحیت کی سخت مذمت کی ہے۔
مراکش نے قطر کی کی خودمختاری اور فضائی حدود کو نشانہ بنانے والے اس صریح میزائل حملے کی شدید مذمت کی ہے۔خلیج تعاون کونسل کے سیکرٹری جنرل جاسم محمد البدیوی نے ایران کی طرف سے ریاست قطر کی سرزمین پر میزائل حملے کی شدید الفاظ میں مذمت کی ہے۔عرب پارلیمنٹ نے بھی قطر کی ریاست کے خلاف ایران کی طرف سے شروع کی گئی جارحیت کی شدید مذمت اور مذمت کا اظہار کیا۔ لبنانی صدر جوزف عون نے قطر پر حملے کی مذمت کی اور اس حملے کو ریاست کی خودمختاری کی خلاف ورزی قرار دیا۔فلسطین نے بھی ایرانی میزائل حملے کی مذمت کرتے ہوئے اسے قطر کی خودمختاری کی کھلم کھلا خلاف ورزی قرار دیا۔
