اسلام آباد(نیوز ڈیسک) اسرائیل کا ایران پر حملہ، معروف جوہری سائنسدان اور فوجی کمانڈر مارے گئے، قم میں سرخ پرچم لہرا دیا گیاجمعہ کی صبح اسرائیل کی جانب سے ایران پر حملے کیے گئے، جن میں دعویٰ کیا گیا ہے کہ ایرانی جوہری تنصیبات اور عسکری مراکز کو نشانہ بنایا گیا۔
ان حملوں میں ایران کی فوجی قیادت کے چند نمایاں افسران کے ساتھ ساتھ معروف جوہری سائنسدان بھی جان سے ہاتھ دھو بیٹھے۔ان حملوں کے بعد ایران کے مقدس شہر قم میں واقع جمکران مسجد کے گنبد پر سرخ پرچم لہرا دیا گیا۔ شیعہ روایات میں سرخ پرچم “انتقام” کی علامت کے طور پر دیکھا جاتا ہے، اور یہ قدم ایران کی جانب سے شدید ردعمل کی غمازی کرتا ہے۔ایرانی سرکاری ذرائع ابلاغ کی جانب سے جاری کی گئی ویڈیوز میں دیکھا جا سکتا ہے کہ درجنوں افراد مسجد جمکران کے صحن میں جمع ہو کر اس اقدام کی حمایت کر رہے ہیں۔
اسرائیلی حملے کے نتیجے میں ایرانی افواج کے سربراہ اور پاسدارانِ انقلاب کے اہم عہدیداروں کی ہلاکت کی اطلاعات سامنے آئی ہیں۔ ان واقعات کے بعد ایران نے جمعے اور ہفتے کی درمیانی شب اسرائیل کو بیلسٹک میزائلوں کے ذریعے منہ توڑ جواب دیا۔یہ سارا معاملہ ایک ایسے وقت میں رونما ہوا ہے جب تہران اور واشنگٹن کے درمیان ایران کے ایٹمی پروگرام سے متعلق حساس مذاکرات کا عمل جاری تھا۔ خطے کی موجودہ صورتحال نہ صرف مشرقِ وسطیٰ بلکہ عالمی امن کے لیے بھی شدید خدشات کو جنم دے رہی ہے۔
