دبئی(این این آئی )دبئی کے وافی سٹی میں وی ایف ایس گلوبل نے دنیا کے سب سے بڑے ویزا ایپلی کیشن سینٹر کا باضابطہ آغازکر دیا ہے۔ عرب ٹی وی کے م طابق دنیا کا یہ سب سے بڑا ویزا ایپلی کیشن سینٹر 200 سے زائد قومیتوں کو خدمات فراہم کرے گا۔ اس مرکز کا افتتاح دبئی کے محکمہ اقتصادیات و سیاحت کے ڈائریکٹر جنرل، ہلال سعید المری، جنرل ڈائریکٹوریٹ آف آئیڈنٹیٹی اینڈ فارنرز افیئرز دبئی کے ڈائریکٹر جنرل، محمد احمد المری، اور وی ایف ایس گلوبل گروپ کے بانی و چیف ایگزیکٹو آفیسر، زوبن کارکاریا نے مشترکہ طور پر کیا۔
اس موقع پر ہلال سعید المری نے افتتاحی تقریب کے موقع پر کہاکہ، یہ مرکز صرف ایک بنیادی ڈھانچے کی کامیابی نہیں بلکہ اس سٹریٹجک سمت کی عکاسی ہے جسے دبئی عالمی نقل و حرکت کو آسان بنانے، مواقع کی راہیں کھولنے اور سیاحت و کاروباری معیشت کی ترقی کے لیے اختیار کر رہا ہے۔ دبئی اکنامک ایجنڈا ڈی-33 کے اہداف کی تکمیل کے لیے عالمی رسائی کو مزید ہموار بنانا ہماری اولین ترجیحات میں شامل ہے۔ہلال سعید المری کے مطابق ویزہ کی سہولت عالمی ٹیلنٹ کو متوجہ کرنے، سیاحتی ترقی، اور بین الاقوامی شراکت داریوں کے لیے ایک کلیدی عنصر ہے، جو دبئی کو دنیا کا سب سے مربوط اور مستقبل کے لیے تیار شہر بنانے کی حکمت عملی میں اہم کردار ادا کرتا ہے۔
