اسلام آباد (نیوز ڈیسک ) عالمی نشریاتی ادارے الجزیرہ نے اپنے ایک تازہ تجزیاتی مضمون میں بھارت کی جانب سے پاکستان پر طاقت کے مظاہرے کی ناکام کوشش پر روشنی ڈالی ہے، جس میں یہ کہا گیا ہے کہ دہلی حکومت کا مقصد طاقتور بننے کا تاثر دینا تھا، لیکن اس سے اس کی کمزوریاں اجاگر ہو گئیں۔مضمون میں کہا گیا ہے کہ جب امریکی صدر کی جانب سے فریقین کو تحمل سے کام لینے اور جنگ بندی پر زور دیا گیا، تو بھارت میں کئی افراد نے اسے واشنگٹن کی دباؤ کے باعث مودی سرکار کی پیچھے ہٹنے کی علامت سمجھا۔ علاوہ ازیں، امریکہ کی جانب سے کشمیر پر ثالثی کی پیشکش نے بھارت کے اس دیرینہ مؤقف کو بھی متزلزل کر دیا کہ وہ کسی تیسرے فریق کی مداخلت کو قبول نہیں کرتا۔
الجزیرہ کے مطابق بھارت عرصے سے جنوبی ایشیاء میں بالا دستی کا خواب دیکھتا آ رہا ہے، جو اسے معیشتی ترقی اور جوہری قوت کی بنیاد پر حاصل ہوتا محسوس ہوتا ہے۔ تاہم کشمیر میں 22 اپریل کے واقعے کے بعد اس کی جوابی کارروائیاں اسے کمزور ثابت کرنے کا باعث بنیں۔ پاکستان نے نہ صرف سفارتی سطح پر بہتر مؤقف اپنایا بلکہ خطے میں اپنی پوزیشن کو بھی مضبوط کیا۔رپورٹ میں بتایا گیا ہے کہ بھارت نے 7 مئی کو بعض گروہوں کے مبینہ کیمپس کو نشانہ بنانے کے لیے ’’آپریشن سندھور‘‘ کا آغاز کیا، جس میں فرانسیسی ساختہ رافیل طیاروں کا استعمال کیا گیا۔
اگرچہ اس کارروائی کو مودی حکومت کی طاقتور شبیہہ کے طور پر پیش کرنے کی کوشش کی گئی، لیکن زمینی حقائق اور پاکستان کی طرف سے سامنے آنے والی اطلاعات اس تاثر کی نفی کرتی ہیں۔پاکستان نے اس حملے کے جواب میں اپنی فضائیہ کو الرٹ کیا، جس کے بعد دعویٰ کیا گیا کہ پاکستان نے پانچ بھارتی طیاروں کو مار گرایا، جن میں رافیل بھی شامل تھے۔ روئٹرز کی رپورٹ کے مطابق، دو امریکی اہلکاروں نے بھی تصدیق کی کہ چینی ساختہ J-10 طیاروں نے بھارتی جیٹس کو نشانہ بنایا، جنہیں چینی انٹیلی جنس سسٹمز کی مدد حاصل تھی۔ دوسری جانب، بھارت نے اس حوالے سے کسی قسم کا نقصان تسلیم نہیں کیا۔بھارتی میڈیا نے ابتدائی طور پر پاکستانی شہروں، خاص طور پر کراچی کی بندرگاہ پر حملے کی خبریں چلائیں، تاہم یہ تمام اطلاعات غلط اور پروپیگنڈا ثابت ہوئیں۔ 9 مئی کو بھارت نے پاکستانی اہداف پر میزائل داغے، جن میں اسلام آباد کے قریب واقع مقامات بھی شامل تھے۔
بھارت کی رافیل طیاروں پر انحصار اور پاکستان کے جدید چینی مدد یافتہ انٹیلی جنس سسٹم کو کم سمجھنا، دہلی کی ایک بڑی غلطی ثابت ہوئی۔جوابی کارروائی میں پاکستان نے بھارتی ایئر بیسز — ادھم پور، پٹھان کوٹ، آدم پور اور بھوج — پر قلیل فاصلے تک مار کرنے والے میزائل اور ڈرون حملے کیے۔ تجزیے کے مطابق، حالیہ برسوں میں پاکستان کو چین کی طرف سے ملنے والی فوجی امداد میں واضح اضافہ ہوا ہے، اور اب 2020 سے پاکستان کی دفاعی درآمدات کا 81 فیصد حصہ چین فراہم کر رہا ہے۔الجزیرہ کے مطابق کئی بھارتی دفاعی تجزیہ کار پہلے ہی خبردار کر چکے تھے کہ چین کے تعاون کے بعد پاکستان کے خلاف فوجی حکمت عملی مزید پیچیدہ ہو جائے گی۔
ان ماہرین کا کہنا تھا کہ بھارت کو کشمیر کے مسئلے پر محدود عالمی حمایت حاصل ہے، اور موجودہ خارجہ پالیسی پر نظرثانی کی ضرورت ہے، مگر دہلی میں ان انتباہات کو مسلسل نظرانداز کیا گیا۔مضمون کے اختتام پر لکھا گیا کہ اب جبکہ بھارت اپنے آئندہ اقدامات پر غور کر رہا ہے، تو اسے اس حقیقت کو تسلیم کرنا چاہیے کہ خفیہ کارروائیوں اور پراکسی وار سے خطے میں استحکام پیدا نہیں ہو سکتا۔ نئی دہلی اور اسلام آباد کو اب دانشمندی سے ایسے فیصلے کرنے ہوں گے جو صرف بیانات کی حد تک نہ ہوں، بلکہ حقیقی پالیسیوں پر مبنی ہوں۔ خطے میں مسلسل کشیدگی کی صورت میں، دونوں ممالک نہ صرف اپنی معیشت کو نقصان پہنچائیں گے بلکہ کروڑوں عوام کو بھی مزید مشکلات میں دھکیل دیں گے۔
