اسلام آباد (نیوز ڈیسک) بھارت نے پاکستان کی ممکنہ جوابی کارروائی کے خدشے کے پیش نظر 25 ہوائی اڈے 9 مئی تک بند کر دیے ہیں۔
ذرائع کے مطابق بھارتی افواج نے گزشتہ رات اندھیرے میں آزاد کشمیر کے علاقوں کوٹلی، مظفر آباد، باغ، اور پاکستانی شہروں مریدکے اور احمد پور شرقیہ پر حملے کیے، جن میں شہری آبادی کو نشانہ بنایا گیا۔ ان حملوں کے نتیجے میں دو مساجد شہید ہوئیں، جبکہ دو بچوں سمیت 26 پاکستانی جاں بحق اور 46 زخمی ہو گئے۔
پاک فوج نے دشمن کی بزدلانہ کارروائیوں کا منہ توڑ جواب دیا، جس کے دوران بھارتی فضائیہ کے تین رافیل طیارے، ایک سخوئی، ایک مگ 29 اور ایک ڈرون تباہ کر دیا گیا۔ اس کے علاوہ بھارتی بریگیڈ ہیڈ کوارٹر کو بھی شدید نقصان پہنچایا گیا۔
دوسری جانب، قومی سلامتی کمیٹی نے پاک فوج کو بھارتی اشتعال انگیزی کا سخت جواب دینے کی مکمل اجازت دے دی ہے۔
بھارتی میڈیا کے مطابق، پاکستان کے ممکنہ ردعمل کے خوف سے بھارت نے ہنگامی صورتحال کا اعلان کرتے ہوئے اپنے متعدد ہوائی اڈے بند کر دیے ہیں۔ بند کیے گئے ہوائی اڈوں میں سری نگر، جموں، لیہہ، امرتسر، پٹھان کوٹ، چندی گڑھ، جودھ پور، جیسلمیر، شملہ، دھرمشالہ اور جام نگر سمیت دیگر مقامات شامل ہیں۔
رپورٹس کے مطابق بھارتی ایئرلائنز نے 200 سے زائد پروازیں منسوخ کر دی ہیں، جبکہ کئی ایئرلائنز نے اپنے فضائی آپریشنز بھی معطل کر دیے ہیں، جس سے بھارتی ایوی ایشن سیکٹر کو کروڑوں روپے کے نقصان کا سامنا ہے۔
