اسلام آباد (نیوز ڈیسک) سعودی عرب کے علاقے حفر الباطن میں پیش آنے والے ایک المناک ٹریفک حادثے میں چار افراد جان کی بازی ہار گئے جبکہ ایک شدید زخمی ہوا ہے۔
سعودی ذرائع ابلاغ کے مطابق حادثہ اس وقت پیش آیا جب ایک تیز رفتار گاڑی نے ٹریفک سگنل کی خلاف ورزی کی اور سامنے سے آنے والی گاڑی سے زور دار ٹکر ہو گئی۔ متاثرہ گاڑی میں ڈرائیور کا چھوٹا بھائی اپنے تین دوستوں کے ہمراہ موجود تھا، جو سب کے سب موقع پر ہی دم توڑ گئے۔
اطلاعات کے مطابق حادثے کا سبب بننے والی دونوں گاڑیاں دو سگے بھائیوں کی زیرِ ملکیت تھیں۔ بڑا بھائی، جو دوسری گاڑی چلا رہا تھا، شدید زخمی ہوا اور اسے فوری طور پر اسپتال منتقل کر دیا گیا ہے۔
عینی شاہدین کا کہنا ہے کہ تصادم اتنا شدید تھا کہ آواز کسی دھماکے سے کم نہ تھی، جبکہ گاڑیوں سے دھواں اٹھنے لگا اور شیشے ٹوٹ کر دور دور تک بکھر گئے۔
اس واقعے سے قبل بھی سعودی عرب میں ایک بس حادثہ پیش آیا تھا، جس میں عمرہ زائرین متاثر ہوئے تھے۔ مدینہ منورہ کی جانب جانے والی بس، جو البدر سے روانہ ہوئی تھی، راستے میں ایک ٹرالر سے ٹکرا گئی۔
حادثے میں تین خواتین سمیت پانچ پاکستانی زائرین جاں بحق ہوئے جبکہ متعدد دیگر زخمی ہوئے۔ ریسکیو حکام نے زخمیوں اور جاں بحق افراد کو قریبی اسپتالوں میں منتقل کر دیا۔ زخمیوں میں بچے، خواتین اور بزرگ افراد شامل ہیں۔
جاں بحق افراد کا تعلق ضلع بہاولنگر سے بتایا گیا ہے۔ دو خواتین گاؤں 228 نائن آر کی رہائشی تھیں، جبکہ ایک خاتون کا تعلق گاؤں 201 مراد سے تھا۔ مرد جاں بحق افراد میں ایک بزرگ گاؤں 39 تھری آر اور دوسرا شخص ڈاہرنوالہ شہر سے تعلق رکھتا تھا۔
