اسلام آباد (نیوز ڈیسک): کیلیفورنیا کی مول کریک اسٹیٹ جیل میں ایک افسوسناک واقعہ پیش آیا، جہاں 62 سالہ سٹیفنی ڈویلز اپنے شوہر ڈیوڈ برنسن سے ملاقات کے لیے گئی تھیں۔ ملاقات کے دوران قیدی شوہر نے مبینہ طور پر ان کا گلا گھونٹ کر جان لے لی۔ ڈیوڈ برنسن 1990 سے چار افراد کے قتل کے جرم میں متعدد بار عمر قید کی سزا کاٹ رہا ہے۔

برطانوی اخبار “دی مرر” کے مطابق واقعے کے بعد برنسن نے جیل حکام کو بتایا کہ سٹیفنی بے ہوش ہو گئی ہیں، مگر بعد میں امادور کاؤنٹی کے کورونر نے ان کی موت کو قتل قرار دے دیا۔ سٹیفنی کے بیٹے، 28 سالہ آرمنڈ ٹورس، نے واقعے پر شدید تشویش کا اظہار کرتے ہوئے کہا کہ یہ سمجھنا مشکل ہے کہ ایک ایسے خطرناک مجرم کو ازدواجی ملاقات کے دوران تنہا رہنے کی اجازت کیسے دی گئی۔

کیلیفورنیا کے محکمہ جیل خانہ جات کے مطابق، ازدواجی ملاقاتوں کے لیے قیدیوں کو کئی سخت اصولوں اور جانچ کے عمل سے گزرنا ہوتا ہے۔ یہ بھی واضح کیا گیا ہے کہ جن قیدیوں پر جنسی جرائم کے الزامات ہوں یا جنہیں سزائے موت دی جا چکی ہو، انہیں اس سہولت سے محروم رکھا جاتا ہے۔

یہ واقعہ اپنی نوعیت کا پہلا نہیں ہے۔ رپورٹ کے مطابق، سٹیفنی ایک سال کے دوران ازدواجی ملاقات کے دوران جان کی بازی ہارنے والی دوسری خاتون ہیں، جس پر جیل سیکیورٹی کے نظام پر کئی سوالات اٹھ رہے ہیں۔