اسلام آباد (نیوز ڈیسک) دبئی میں تیار کی جانے والی ایک خاص چاکلیٹ بار “Can’t Get Knafeh of It” نے عالمی سطح پر غیر معمولی مقبولیت حاصل کر لی ہے۔ یہ چاکلیٹ 2021 میں فِکس نامی مشہور چاکلیٹیئر نے متعارف کرائی تھی، لیکن اس کا جنون دسمبر 2023 میں اس وقت آسمان کو چھونے لگا جب ایک ٹک ٹاک ویڈیو نے اس چاکلیٹ کو شہرت کی بلندیوں پر پہنچا دیا۔

مذکورہ ویڈیو نے چند ہی دنوں میں 120 ملین (12 کروڑ) سے زائد ویوز حاصل کیے، جس کے بعد دنیا بھر میں اس چاکلیٹ کی مانگ میں بے تحاشا اضافہ ہو گیا۔ اس چاکلیٹ کی سب سے نمایاں خصوصیت اس کی اندرونی فِلنگ ہے، جو کہ مشرقِ وسطیٰ کی معروف میٹھی ڈش کنافہ سے متاثر ہو کر تیار کی گئی پستے کی گاڑھی اور خوشبودار تہہ پر مشتمل ہے۔

یہ منفرد ذائقہ صارفین کو اتنا پسند آیا کہ دبئی آنے والے افراد نے اصل چاکلیٹ خریدنے کے لیے قطاریں لگا لیں۔ جب کہ دیگر ممالک میں چاکلیٹ کی اس مانگ کو پورا کرنے کے لیے مختلف کمپنیاں اس کی مشابہت میں نقل تیار کرنے لگیں۔

فِکس کی اس شاندار تخلیق نے نہ صرف ذائقے کے شوقین افراد کو اپنا گرویدہ بنایا بلکہ عالمی مارکیٹ میں پستے کی فراہمی پر بھی اثر ڈالا، اور پستہ مہنگا و نایاب ہوتا گیا۔ خوراک اور میٹھے کے شوقین افراد آج بھی اس چاکلیٹ کو حاصل کرنے کے لیے بیتاب نظر آتے ہیں۔