اسلام آباد (نیوز ڈیسک) پاکستان کی آٹو مارکیٹ میں حالیہ دنوں ایک خبر نے خاصی ہلچل پیدا کر دی ہے۔ سوشل میڈیا پر ایک مبینہ “سرکاری” نوٹیفکیشن کے ذریعے دعویٰ کیا گیا کہ لکی موٹرز نے کیا اسپورٹیج ایل 2.0 ایل ایف ڈبلیو ڈی ویرینٹ کی قیمت میں 10 لاکھ روپے تک کمی کر دی ہے، جس کے بعد اس گاڑی کی قیمت ایک کروڑ 18 لاکھ 25 ہزار روپے سے گھٹ کر ایک کروڑ 8 لاکھ 25 ہزار روپے ہو گئی ہے۔
یہ افواہیں اس وقت زور پکڑ گئیں جب ہنڈائی پاکستان نے ٹکسن ہائبرڈ 2025ء ماڈل متعارف کرایا، جسے ایس یو وی مارکیٹ میں کیا اسپورٹیج کے لیے ایک بڑی مسابقت تصور کیا جا رہا ہے۔ ٹکسن ہائبرڈ کے اسمارٹ ویرینٹ کی قیمت ایک کروڑ 10 لاکھ 99 ہزار روپے جبکہ سگنیچر ویرینٹ کی قیمت ایک کروڑ 19 لاکھ 99 ہزار روپے مقرر کی گئی، جو کہ کیا کی نان ہائبرڈ اور ہائبرڈ ماڈلز کے مقابلے میں خاصی مناسب ہیں۔
ان بدلتی قیمتوں نے سوالات کو جنم دیا کہ آیا لکی موٹرز بھی مارکیٹ میں مقابلہ برقرار رکھنے کے لیے اپنی گاڑیوں کی قیمتیں کم کرے گا؟
تاہم کمپنی نے اس خبر کا فوری نوٹس لیتے ہوئے ایک باضابطہ اعلامیہ جاری کیا، جس میں اس مبینہ کمی کو “جھوٹی اور گمراہ کن” قرار دیا گیا۔ لکی موٹرز نے صارفین سے اپیل کی کہ وہ ایسی غیر مصدقہ معلومات پر اعتماد نہ کریں اور صرف تصدیق شدہ ذرائع پر ہی انحصار کریں۔
قیمتوں کا تقابلی جائزہ درج ذیل ہے:
کیا اسپورٹیج ایل کی قیمتیں:
اسپورٹیج ایل الفا – 94,99,000 روپے
اسپورٹیج ایل 2.0 ایل ایف ڈبلیو ڈی – 1,18,25,000 روپے
اسپورٹیج ایل HEV – 1,28,50,000 روپے
ٹکسن ہائبرڈ 2025 کی قیمتیں:
ٹکسن ہائبرڈ اسمارٹ – 1,10,99,000 روپے
ٹکسن ہائبرڈ سگنیچر – 1,19,99,000 روپے
یقیناً، قیمتوں میں کمی کی خبریں موجودہ غیر یقینی معاشی حالات میں کشش رکھتی ہیں، لیکن اس طرح کے دعوؤں پر بھروسا کرنے سے قبل ان کی تصدیق کرنا نہایت ضروری ہے۔
فی الحال، کیا کمپنی نے اسپورٹیج ایل ویرینٹس کی قیمتوں میں کوئی رد و بدل نہیں کیا ہے اور وائرل ہونے والی فہرست جھوٹ پر مبنی ہے۔
