اسلام آباد (نیوز ڈیسک) بھارتی شہر علی گڑھ سے ایک حیران کن اور غیر معمولی واقعہ منظرِ عام پر آیا ہے، جہاں ایک خاتون اپنی ہی بیٹی کے منگیتر کے ساتھ شادی سے محض 9 دن قبل گھر سے فرار ہو گئی۔
یہ واقعہ تھانہ مدرک کے علاقے میں پیش آیا۔ اطلاعات کے مطابق مذکورہ خاتون نہ صرف اپنی بیٹی کے ہونے والے شوہر کے ساتھ چلی گئی، بلکہ ساتھ ہی شادی کے لیے محفوظ کیے گئے زیورات اور نقد رقم بھی لے اُڑی۔
بھارتی میڈیا ادارے نیوز 18 کی رپورٹ کے مطابق لڑکی کا منگیتر درحقیقت اس کی ماں کے ساتھ محبت میں مبتلا ہو چکا تھا، اور دونوں نے خفیہ طور پر گھر چھوڑنے کا منصوبہ بنایا۔ لڑکی کے والد نے پولیس میں رپورٹ درج کروا دی ہے، اور دونوں کی تلاش جاری ہے۔
اہل خانہ کے مطابق شادی کی تمام تیاریاں مکمل ہو چکی تھیں، اور 16 اپریل کی تاریخ طے کی گئی تھی۔ شادی کے دعوت نامے بھی عزیز و اقارب میں تقسیم کر دیے گئے تھے۔ داماد اکثر اوقات شادی کی تیاریوں کا بہانہ بنا کر سسرال آتا جاتا رہتا تھا، لیکن کسی کو یہ اندازہ نہیں تھا کہ ساس اور داماد کے درمیان ناجائز تعلق قائم ہو چکا ہے۔
ذرائع نے بتایا کہ داماد نے اپنی ہونے والی ساس کو ایک موبائل فون بھی تحفے میں دیا تھا، لیکن خاندان والوں نے اسے عام بات سمجھ کر نظرانداز کر دیا۔
شادی سے صرف چند دن قبل جب دونوں خریداری کے لیے گھر سے نکلے تو واپس نہیں آئے۔ لڑکی کے والد کو شک ہوا تو اس نے گھر کی تلاشی لی، جہاں الماری سے زیورات اور نقدی غائب ملی، جس سے تمام شبہات یقین میں بدل گئے۔
پولیس نے دونوں کی موبائل فون لوکیشنز ٹریس کرنا شروع کر دی ہیں اور ان کی تلاش کے لیے کوششیں جاری ہیں۔
