نئی دہلی (این این آئی)بھارت میں عجیب و غریب منظر نے لوگوں کو حیران کردیا جس کی ویڈیو سوشل میڈیا پر وائرل ہوگئی۔بھارتی میڈیا رپورٹ کے مطابق ریاست گجرات کے ڈانگ ضلع میں ساپوترا کا دورہ کرنے والے سیاحوں نے 150 فٹ اونچے ریت کے طوفان کا مشاہدہ کیا۔
ایک مقامی کارٹ فروش نے ٹیبل پوائنٹ کے اوپر نایاب نظارے کو ریکارڈ کیا جو کہ ایک مشہور ہل اسٹیشن کی جگہ ہے۔وائرل ویڈیو میں زمین سے 150 فٹ اونچے ریت کے طوفان کو دیکھا جاسکتا ہے جبکہ قرب و جوار میں لوگ بھی موجود ہیں جو اس منظر کو ریکارڈ کررہے ہیں۔واضح رہے کہ حالیہ برسوں میں دھول اور ریت کے بڑھتے ہوئے طوفانوں کے مضر صحت ماحولیاتی اثرات پر سائنس دان خطرے کی گھنٹی بجا رہے ہیں۔
اس طرح کے طوفان اکثر اوقات بصارت کو دھندلا دیتے ہیں، میری ٹائم اور فلائٹ آپریشن میں خلل ڈالتے ہیں، انسانی صحت کو نقصان پہنچاتے ہیں جس کے باعث بسا اوقات سکول بند کرنے پڑتے ہیں اور نیلے آسمان کو بھی نارنجی رنگ میں بدل دیتے ہیں۔دھول کے باریک ذرات کے باعث دمہ کے مرض میں اضافہ اور بیکٹیریا اور محلق وائرس کے ساتھ بہت کچھ اس سے منسلک تھا۔محکمہ موسمیات کے سائنسدانوں کا کہنا تھا کہ موسم اور آب و ہوا کے پیش نظر ایسے طوفان کے باعث دھول کئی دنوں تک فضا میں رہ سکتی ہے اور کافی دور تک سفر کر سکتی ہے۔
