اسلام آباد (نیوز ڈیسک): گرین لینڈ کے شہریوں نے امریکا کا حصہ بننے کے امکان پر اپنی رائے ظاہر کر دی۔ امریکی صدر ڈونلڈ ٹرمپ نے اپنی صدارت کے دوران متعدد بار گرین لینڈ کو امریکا میں شامل کرنے کی خواہش ظاہر کی تھی۔ وہ اس مقصد کے لیے مختلف اقدامات پر غور بھی کر چکے تھے، جن میں تجارتی پابندیاں عائد کرنا اور دیگر دباؤ کے طریقے شامل تھے۔ یہ قیاس کیا جاتا ہے کہ گرین لینڈ میں قیمتی معدنیات اور تیل کے وسیع ذخائر موجود ہیں، جس کی وجہ سے یہ علاقہ امریکا کے لیے کشش رکھتا ہے۔

بین الاقوامی خبررساں ادارے کے مطابق حالیہ سروے میں گرین لینڈ کے شہریوں سے پوچھا گیا کہ آیا وہ امریکا میں شامل ہونا چاہتے ہیں یا نہیں۔ نتائج کے مطابق، 85 فیصد شہریوں نے امریکا کے ساتھ الحاق کو مسترد کر دیا، جبکہ صرف 6 فیصد افراد نے اس کی حمایت کی۔ مزید 9 فیصد افراد نے کوئی واضح رائے دینے سے گریز کیا۔

سروے میں یہ بھی سامنے آیا کہ گرین لینڈ کے 45 فیصد شہری صدر ٹرمپ کی اس پیشکش کو اپنے خطے کے لیے خطرہ سمجھتے ہیں، جبکہ 43 فیصد اسے ایک ممکنہ موقع قرار دیتے ہیں۔

یہ بات قابل ذکر ہے کہ ڈنمارک کے زیرِ انتظام اس خودمختار علاقے کی مجموعی آبادی تقریباً 57 ہزار نفوس پر مشتمل ہے۔