اسلام آباد (نیوز ڈیسک)چینی چڑیا گھر کی جانب سے شیر کی غلاظت کو طبی فوائد کے دعوے کے ساتھ فروخت کرنے پر تنقیدچین کے ایک معروف چڑیا گھر نے شیر کی غلاظت کو طبی فوائد کا ذریعہ قرار دیتے ہوئے فروخت کرنا شروع کر دیا ہے، جس پر اسے شدید تنقید کا سامنا ہے۔چینی میڈیا کے مطابق، یہ واقعہ صوبہ سیچوان کے یان بائیفینگشیا وائلڈ لائف چڑیا گھر میں پیش آیا، جہاں ایک سیاح نے سیر کے دوران اس حیران کن حقیقت کو دریافت کیا اور سوشل میڈیا پر پوسٹ کر دی۔

سوشل میڈیا پر وائرل ہونے والی اس پوسٹ کے مطابق، چڑیا گھر سائبرین ٹائیگر کے پیشاب کو بوتلوں میں بند کرکے تقریباً 7 ڈالر (2 ہزار پاکستانی روپے) میں فروخت کر رہا ہے۔ بوتل پر درج تفصیلات میں دعویٰ کیا گیا ہے کہ اس پیشاب کے استعمال سے جوڑوں کے درد، موچ اور پٹھوں کی تکلیف میں کمی آتی ہے۔ مزید یہ بھی لکھا گیا ہے کہ اگر اسے سفید شراب میں ملا کر پیا جائے تو مزید بہتر نتائج حاصل کیے جا سکتے ہیں، جبکہ استعمال سے پہلے متاثرہ حصے پر ادرک لگانے کا بھی مشورہ دیا گیا ہے۔

چڑیا گھر کی انتظامیہ نے اس مائع کو پینے کی ہدایت تو کی ہے لیکن ساتھ ہی یہ انتباہ بھی دیا ہے کہ اگر الرجی کی علامات ظاہر ہوں تو فوری طور پر استعمال ترک کر دینا چاہیے۔یہ خبر سوشل میڈیا پر جنگل کی آگ کی طرح پھیل گئی، اور صارفین نے چڑیا گھر پر شدید تنقید کی۔ کئی افراد نے اس اقدام کو غیر سائنسی اور خطرناک قرار دیا، جبکہ کچھ صارفین نے اس پر حیرت اور غصے کا اظہار کیا ہے۔