لاہور(نیوزڈیسک)2018ءمیں ہونے والے عام انتخابات نادرا کی بجائے الیکشن کمیشن کی طرف سے مرتب کی جانے والی کمپیوٹر ائزڈ ووٹرز لسٹوں کے مطابق ہوں گے ۔صوبائی الیکشن کمشنر کی ترجمان نے ”این این آئی “کو بتایا کہ حلقہ این اے 122اور پی پی 147 کے ووٹ انتظامی بنیادوں پر ہر گز دوسرے علاقوں میں منتقل نہیں کیے گئے اور نہ ہی اس کی کوئی ضرورت تھی کیونکہ یہ بلدیاتی نہیں صرف ایک قومی اور ایک صوبائی حلقہ کے انتخابات تھے ، بلدیاتی کیلئے ہمیں وارڈز کی تقسیم کے تحت نئی فہرستیں بنانا پڑتیں البتہ نادرا کی جانب سے کچھ تکنیکی خرابیوں کی وجہ سے کچھ لوگوں کے ووٹ ان کی مستقل رہائش گاہوں پرمنتقل ضرور ہوئے ہیں۔صوبائی الیکشن کمشنر کی ترجمان نے کہا کہ ضمنی انتخاب میں 2012ءکی ووٹر فہرستیں اس لیے استعمال کی گئیں کیونکہ ان کو سال 2013ءکے عام انتخابات کیلئے حتمی طورپر مرتب کیا گیا تھالیکن ان فہرستوں میں نئے ووٹرز کا اندراج شامل تھا۔ تاہم 2018ءکے عام انتخابات کی کمپوٹر ائزڈ ووٹر لسٹیں الیکشن کمیشن مرتب کرے گا اس حوالے سے نادرا کے ساتھ پیشرفت جا ری ہے ۔ فہرستوں کو شفا ف اور نقائص سے مبرا بنانے کیلئے الیکشن کمیشن اپنے تمام تر وسائل بروئے کار لائے گا ۔