لاہور (این این آئی)مریم نواز اور یو اے ای کے صدر کی جعلی تصاویر شیئر کرنے پر ایف آئی اے نے صحافی عمران ریاض، پی ٹی آئی لیڈر شہباز گل سمیت مزید 5ملزمان پر مقدمات درج کرتے ہوئے 2ملزمان کو گرفتار کرلیا۔نجی ٹی وی کے مطابق وزیراعلی پنجاب مریم نواز شریف اور یو اے ای کے صدر کی اے آئی کے ذریعے بنائی گئی جعلی تصاویر شیئر کرنے پر ایف آئی اے سائبر کرائم ونگ نے عمران ریاض خان، شہباز گل سمیت مزید 5ملزمان پر مقدمات درج کرلئے ہیں۔

شہباز گل اور عمران ریاض کیخلاف مقدمہ ایف آئی اے سائبر کرائم لاہور میں پیکا ایکٹ 2016 کی مختلف دفعات کے تحت درج کیا گیا ہے جبکہ ملتان اور فیصل آباد میں بھی 3ملزمان عامر عباس، اعجاز اور ندیم جاوید پر مقدمات درج کرتے ہوئے عامر عباس اور اعجاز کو گرفتار کرلیا گیا ہے جبکہ ایک ملزم کی گرفتاری باقی ہے۔ایف آئی اے حکام کے مطابق ملزمان پر ملکی اور غیر ملکی اہم شخصیات کی اے آئی جنریٹڈ تصاویر شیئر کرنے کا الزام ہے۔