ممبئی (این این آئی)بالی ووڈ کے معروف گلوکار شان کی رہائشی عمارت میں آگ لگنے سے 80سالہ خاتون شدید جھلس گئی۔بھارتی میڈیا کے مطابق متاثرہ خاتون کو ریسکیو کر کے ہسپتال منتقل کر دیا گیا ہے تاہم اس کی حالت تشویشناک بتائی جارہی ہے۔ یہ واقعہ ممبئی کے علاقے باندرہ ویسٹ میں واقع فارچیون انکلیو عمارت کی 7ویں منزل پر پیش آیا جبکہ گلوکار شان اسی عمارت کی 11ویں منزل پر رہائش پذیر ہیں۔

آگ لگنے کی ممکنہ وجہ شارٹ سرکٹ کو قرار دیا جا رہا ہے، تاہم اس کی تصدیق نہیں ہو سکی جبکہ آگ پر قابو پالیا گیا ہے۔بھارتی میڈیا کے مطابق گلوکار شان نے اس حادثے پر اپنا بیان دیتے ہوئے کہا ہے کہ آگ عمارت کی 7ویں منزل پر لگی، لیکن میں اور میرے اہل خانہ 15ویں منزل پر جا کر محفوظ رہے اور ریسکیو عملے کا انتظار کیا۔