لاہور ( این این آئی) پاکستان کے سینئر لیجنڈری اداکار عابد کشمیری 74سال کی عمر میں مختصر بیماری کے بعد انتقال کرگئے۔اہلِ خانہ کے مطابق عابد کشمیری کچھ عرصے سے بیمار تھے، ان کی عمر 74 سال تھی۔مرحوم نے پسماندگان میں 2بیٹے اور 2 بیٹیاں چھوڑی ہیں۔وزیراعلی پنجاب مریم نواز نے نامور اداکار عابد کشمیری کے انتقال پر اظہارِ افسوس اور سوگوار خاندان سے اظہارِ ہمدردی کیا ہے۔

انہوں نے اپنے تعزیتی پیغام میں کہا کہ عابد کاشمیری ورسٹائل اداکار تھے ۔ مداحین کو تادیر کمی محسوس ہوگی۔ عابد کشمیری 4مئی 1950ء کو لاہور میں پیدا ہوئے۔ انہوں نے سینکڑوں ٹی وی ڈراموں، اسٹیج اور فلموں میں کام کیا ہے۔ اپنی بے ساختہ مزاحیہ اداکاری کے باعث وہ شائقین کے دلوں پر راج کرتے تھے۔

عابد کشمیری کو 1988ء میں ریلیز ہونے والی فلم ”بازار حسن ”پر بہترین مزاحیہ اداکار کے لیے نگار ایوارڈ سے نوازا گیا تھا۔ان کی مشہور فلموں میں ”جیتے ہیں شان سے ”اور ”آہٹ ”بھی شامل ہیں۔عابد کشمیری کے ٹی وی ڈراموں کی بھی ایک طویل فہرست ہے۔ان میں لوہاری گیٹ، سورج کے ساتھ ساتھ، تیسرا کنارہ اور اپنے لوگ سمیت دیگر ڈرامے شامل ہیں۔ڈرامہ سمندر میں عابد کشمیری کا کردار گلو بادشاہ بہت مقبول ہوا تھا۔