اسلام آباد (این این آئی)سردار اختر جان مینگل سے پاکستان تحریک انصاف کے وفد نے ملاقات کی جس میں پی ٹی آئی نے استعفیٰ واپس لینے کی درخواست کی ۔ بدھ کو ہونے والی ملاقات میں قائد حزب اختلاف عمر ایوب خان،سابق اسپیکر اسد قیصر، صاحبزادہ حامد رضا، اخونزادہ حسین یوسفزئی، عامر ڈوگر اور رؤف حسن شامل تھے۔تحریکِ انصاف کے وفد نے سردار اختر مینگل کو استعفیٰ واپس لینے کی درخواست کی۔پی ٹی آئی نے کہاکہ قومی اسمبلی سے استعفیٰ کے فیصلے پر نظر ثانی کی جائے۔
پی ٹی آئی کے وفد نے اختر مینگل کو پارلیمنٹ کے اندر جدوجہد کرنے کی درخواست کرتے ہوئے کہا کہ استعفیٰ واپس لے کر پارلیمنٹ کے اندر رہتے ہوئے مشترکہ جدوجہد کریں۔اپوزیشن رہنماؤں نے بلوچستان کے موجودہ صورتحال پر شدید تشویش کا اظہار کیا اور کہاکہ موجودہ حکومت نے قومی اسمبلی کو ربڑ سٹیمپ بنا دیا۔
اپوزیشن نے کہاکہ بار بار بلوچستان کے مسائل پر بات کی مگر حکومت کی طرف سے کوئی سنجیدگی نہیں دکھائی۔ عمر ایوب نے کہاکہ موجودہ اسمبلی شدید سینسر شپ کا شکار ہے،بلوچستان کے حالات سنگین نوعیت کے ہیں۔سر دار اختر مینگل نے کہاکہ بلوچستان کے اصل مسائل کوئی سمجھنا ہی نہیں چاہتا،بلوچستان کے مسئلے پر سیر حاصل بحث ہونی چاہیے۔عمر ایوب نے کہاکہ مشکل کی اس گھڑی میں بلوچستان کے عوام کو کسی صورت تنہا نہیں چھوڑیں گے۔
