لاہور ( این این آئی) پاکستان مسلم لیگ (ن) کے صدر و سابق وزیر اعظم میاں نوازشریف کا آئندہ ماہ ستمبر کے دوسرے ہفتے لندن جانے کا امکان ہے ۔پارٹی ذرائع کے مطابق سابق وزیراعظم نواز شریف 11ستمبر کو اپنی اہلیہ بیگم کلثوم نواز کی برسی کے بعد لندن کے لیے روانہ ہو سکتے ہیں۔

نواز شریف کو لندن میں اپنے معالجین سے طبی معائنہ کرانا ہے جس کے بعد اپنے صاحبزادوں کے ساتھ وقت گزاریں گے۔ نواز شریف کا دو سے تین ہفتے تک لندن میں قیام کا امکان ہے ۔لندن میں کچھ اہم سیاسی ملاقاتوں کا بھی امکان ہے۔ذرائع کا کہنا ہے کہ نواز شریف کی لندن روانگی سیاسی حالات سے مشروط ہو سکتی ہے۔واضح رہے کہ سابق وزیراعظم نواز شریف گزشتہ سال 21اکتوبر کو وطن واپس پہنچے تھے جبکہ اس سے قبل نواز شریف 4سالوں سے لندن میں علاج معالجے کے لیے قیام پذیر تھے۔