سرینگر( اے این این )مقبوضہ جموں کشمیر اسمبلی اجلاس چوتھے روز بھی ہنگامہ آرائی اور تشدد کی نذر ہوگیا ،سپریم کورٹ کی جانب سے پابندی کے خاتمے پر ایم ایل اے ہاسٹل میں بیف پارٹی کے انعقاد پر انتہا پسند بی جے پی ممبران نے آزاد ممبر اسمبلی عبدالرشید لنگیٹ کو شدید تشدد کا نشانہ بنایا۔بھارتی میڈیا کے مطابق حکمران اتحاد میں شامل بی جے پی اور ایم جے پی (مہاگجرات جنتا پارٹی)کے ممبران اسمبلی نے آزادرکن اسمبلی انجینئر عبدالرشید لنگیٹ کو جمعرات کے روز وقفے کے بعد اسمبلی اجلاس دوبارہ شروع ہونے سے چند منٹ قبل ایم ایل اے ہاسٹل میں بیف پارٹی کے انعقاد پر شدید تشدد کا نشانہ بنایا ۔رشید پر تشدد کرنے والوں میں بی جے پی کے ممبر قانون سازاسمبلی ریویندر رانا بھی شامل تھے ۔واضح رہے کہ بھارتی سپریم کورٹ نے مقبوضہ جموں کشمیر میں گائے کے گوشت پر پابندی کے شدید احتجاج کے بعد دو ماہ کیلئے پابندی ختم کردی ہے ۔