لندن (این این آئی)اڈیالہ جیل میں قید بانی پاکستان تحریک انصاف(پی ٹی آئی)عمران خان جیل سے ہی برطانیہ کی مشہور زمانہ آکسفورڈ یونیورسٹی کے چانسلر کا الیکشن لڑیں گے’اس الیکشن کی دوڑ میں برطانیہ کے سابق وزرائے اعظم سر ٹونی بلیئر اور بورس جانسن بھی شخصیات بھی شریک ہیں۔بین الاقوامی میڈیا کے لیے بانی پی ٹی آئی کے مشیر زلفی بخاری نے برطانوی جریدے دی ٹیلی گراف کو انٹرویو دیتے ہوئے کہا کہ عمران خان آکسفورڈ یونیورسٹی کے چانسلر کے لیے الیکشن لڑیں گے کیونکہ لوگوں کا مطالبہ ہے کہ وہ یہ الیکشن لڑیں۔ان کا کہنا تھا کہ عمران خان سے اجازت ملنے کے بعد ہم اس کا باضابطہ اعلان کریں گے اور دستخطی مہم شروع کریں گے۔
دی ٹیلی گراف نے اپنی رپورٹ میں کہا کہ آکسفورڈ یونیورسٹی کے چانسلر کی نشست ہانگ کانگ کے سابق گورنر اور 21 سال تک اس عہدے پر فائز رہنے والے ٹوری پارٹی کے چیئرمین 80 سالہ لارڈ پیٹن کے استعفے کے بعد خالی ہوئی ہے۔جریدے کے مطابق یہ پہلا موقع ہوگا جب چانسلر کے انتخابات روایتی طریقہ کار کے برعکس آن لائن ہوں گے جس میں ادارے سے فارغ التحصیل افراد اپنے مکمل تعلیمی لباس میں الیکشن میں شرکت کرتے ہیں۔
عمران خان نے آکسفورڈ یونیورسٹی کے کیبل کالج سے اکنامکس میں ڈگری حاصل کی تھی۔دی ٹیلی گراف نے کہا کہ آکسفورڈ کے چانسلر بننے کا فیصلہ کرنے سے پہلے عمران 2005 سے 2014 تک بریڈ فورڈ یونیورسٹی کے چانسلر کے طور پر بھی خدمات انجام دے چکے ہیں۔تاہم اخبار کے مطابق عمران خان کے اس الیکشن میں جیتنے کے امکانات انتہائی کم ہیں کیونکہ اس الیکشن کی دوڑ میں برطانیہ کے سابق وزرائے اعظم سر ٹونی بلیئر اور بورس جانسن بھی شخصیات بھی شریک ہیں۔
