اسلام آباد (این این آئی) ترجمان جے یو آئی (ف) اسلم غوری نے کہاہے کہ مدارس بارے ڈی جی آئی ایس پی آر کی معلومات نامکمل ہیں۔ اپنے بیان میں اسلم غوری نے کہاکہ عالمی سطح پر پاکستانی دینی مدارس کی خدمات کو سراہاجاتا ہے۔
اسلم غوری نے کہاکہ ہماری اپنی ریاست کو ان مدارس کے بارے میں معلومات مکمل نہیں۔ انہوںنے کہاکہ مدارس بارے ڈی جی آئی ایس پی آر کی معلومات نامکمل ہیں۔انہوںنے کہاکہ مدارس کا مربوط اور منظم نیٹ ورک ہے ، ہزاروں مدارس بارے ایسی رپورٹ سے ادارے کی اہلیت پر سوال اٹھیں گے۔انہوںنے کہاکہ تمام مکاتب فکر کے مدارس کے بورڈ رجسٹرڈ ہیں،ہر مکتبہ فکر کے تعلیمی بورڈ کے پاس ہر مدرسہ رجسٹرڈ اور ہر طالب علم اور انتظامیہ کا ریکارڈ موجود ہے۔
ترجمان نے بتایا کہ ریاست مذہبی تعلیم کی سرپرستی کی بجائے ہمیشہ مدارس کی راہ میں روڑے اٹکاتی ہے۔ترجمان نے کہاکہ اسلام کے نام پر بننے والے ملک میں اسلامی ادارے ہی ٹارگٹ کیوں؟ ۔ انہوںنے کہاکہ عصری اداروں پر قوم کا کروڑوں روپیہ خرچ ہوتا ہے جبکہ مدارس اپنی مدد آپ کے تحت چلتے ہیں تب بھی مطعون ہوتے ہیں۔اسلم غوری نے کہاکہ مدارس پر تنقید کر کے اصل حقائق نہیں چھپائے جا سکتے۔
انہوںنے کہاکہ بنوں میں آپکی پالیسیوں کے خلاف عام شہری باہر نکلا ہے حقائق کو سامنے رکھ کر پالیسیاں بنائی جائیں ۔ ترجمان نے کہاکہ جب تک تمام ادارے آئین میں دیئے گئے اختیارات کے اندر نہیں رہیں گے مسائل کو حل نہیں کیا جا سکتا۔
