کوٹ رادھا کشن ( این این آئی)کوٹ رادھاکشن کے نواحی علاقہ بھمبہ میں محنت کش کا مبینہ طور پر امانت کے طور پر رکھی گئی رقم واپس مانگنا جرم بن گیا ،گودام مالک عرفان نے طیش میں آکر اویس نامی نوجوان کو بدترین تشدد کا نشانہ بنایا اور بعد ازاں تیزدھار آلے سے نوجوان کے دائیں ہاتھ کی چار انگلیاں کاٹ دیں۔تفصیلات کے مطابق انسانیت سوز واقعہ تھانہ کوٹ رادھاکشن کی حدود بھمبہ میں انسانیت سوز واقعہ پیش آیا ۔
بتایا گیاہے کہ اویس نامی نوجوان کئی سالوں سے عرفان نامی شخص کے گودام پر کام کرتا تھا اس نے مبینہ طور پر بطور امانت اپنی تنخواہ مالک کے پاس جمع کی ہوئی تھی ۔ اہل خانہ کے مطابق اویس نے بہن کی شادی کے لئے اپنی جمع شدہ رقم کا گودام مالک عرفان سے تقاضہ کیا تو ملزم طیش میں آگیا اور اویس کوبدترین تشدد کانشانہ بنایا اور بعد ازاںسفاک ملزم نے غریب محنت کش نوجوان کے دائیں ہاتھ کی چاروں انگلیوں کو تیز دھار آلہ کے وار سے کاٹ ڈالا اور الٹا بدفعلی کا مقدمہ بھی اویس پر ہی درج کروا دیا۔متاثرہ فیملی نے اندراج مقدمہ کے لئے تھانہ کوٹ رادھاکشن میں تحریری درخواست دے دی ہے۔
