راولپنڈی(این این آئی)سینٹرل جیل اڈیالہ راولپنڈی میں ایمرجنسی حالات سے نمٹنے کیلئے ہنگامی مشق کی گئی جس میں رینجرز، پولیس، ریسکیو 1122اور بم ڈسپوزل اسکواڈ کے عملے نے حصہ لیا۔تفصیلا ت کے مطابق اڈیالہ جیل میں مشق کے دوران دہشت گردی کی کارروائیوں سے نمٹنے کا عملی مظاہرہ کیاگیا جبکہ ایمرجنسی کی اطلاع کے جواب میں پولیس جیل عملے اور امدادی اداروں کے عملے کا رسپانس ٹائم بھی چیک کیا گیا۔

پولیس، رینجرز نے ہنگامی مشق کے دوران حملہ آور کی موجودگی پر ان کو کامیابی سے قابو کیا گیا،حملے سے نمٹنے کے بعد جیل کے باہر اور کمپاونڈ کے اندر بھی رینجرز اور پولیس نے سرچ آپریشن بھی کیا۔محکمہ داخلہ پنجاب نے سینٹرل جیل اڈیالہ سمیت چند دیگر جیلوں میں سیکورٹی بہتر بنانے کے احکامات جاری کر رکھے ہیں۔ سیکیورٹی خطرات کے پیش نظر اڈیالہ جیل سمیت دیگر جیلوں میں قید اسیروں سے ملاقات پر دو ہفتے کی پابندی عائد کی گئی ہے۔