سانگلا ہل( این این آئی)رمضان کی آمد ،مہنگائی کا جن بوتل سے باہر آگیا،اشیا خوردو نوش کے ریٹ دوگنا سے بھی بڑھ گئے،کھانے پینے والی تمام اشیا کے دام کئی گنا زیادہ ہو گئے،سبزی اور فروٹ بھی عام آدمی کی پہنچ سے دور ہوگیا،انتظامیہ خاموش تماشائی بن کر رہ گئی،شہریوں کا کوئی پرسان حال نہیں۔شہریوں نے وزیر اعلی پنجاب مریم نواز شریف سے مطالبہ کیا ہے کہ پنجاب حکومت خود ساختہ مہنگائی کرنے والوں کے گرد قانون کا شکنجہ سخت کرے،

اگر رمضان المبارک کے پہلے عشرہ میں گراں فروشوں پر قابو نہ پایا گیا تو باقی روزوں میں وہ تسلسل کو برقرار رکھیں گے،شہریوں کا کہنا ہے کہ پاکستان میں ماہ مقدس کی آمد کے ساتھ ہی گراں فروش متحرک ہو جاتے ہیں، نام کے ہم مسلمان ہیں لیکن اس ماہ مبارک پر بجائے اشیا ضرورت کی قیمتوں کو کم کریں ہم الٹا اس میں خود ساختہ اضافہ کر دیتے ہیں تاکہ کوئی غریب آدمی اچھی طرح سے روزہ بھی نہ رکھ سکے،شہریوں نے مزید کہا کہ اسسٹنٹ کمشنر کو چاہیے کہ وہ اپنے دفتر سے نکلیں اور روز مرہ استعمال ہونے والی اشیا کی روزانہ کی بنیاد پر قیمتیں چیک کریں اور جو دکاندار اضافی قیمت پر سامان فروخت کرتا پایا جائے اسکو بھاری بھر کم جرمانہ کرے تاکہ وہ آئندہ خودساختہ مہنگائی کرنے کی جرات نہ کرے۔