اسلام آباد(این این آئی)پاکستان پیپلز پارٹی نے آئی ایم ایف کے ساتھ مذاکرات کا حصہ نہ بننے کا اعلان کرتے ہوئے کہاہے کہ ہم کابینہ میں شامل نہیں تو کس حیثیت میں آئی ایم ایف کیساتھ مذاکرات کریں۔نجی ٹی وی کے پروگرام میںگفتگو کرتے ہوئے سینیٹر اور سیکرٹری خزانہ پیپلزپارٹی سلیم مانڈوی والا نے کہاکہ ہم آئی ایم ایف کے ساتھ مذاکرات کا حصہ نہیں بنیں گے، ہم اگر کابینہ میں شامل نہیں تو کس حیثیت میں آئی ایم ایف کے ساتھ مذاکرات کریں۔
ایک سوال پر انہوں نے کہا کہ ماضی میں آئی ایم ایف نے دیگر جماعتوں کے ساتھ مشاورت کی کہ وہ جماعتیں حکومت کو سپورٹ کر رہی ہیں یا نہیں، ہم حکومت کو سپورٹ کریں گے۔انہوںنے کہاکہ ہمارے خرچے زیادہ آمدنی کم ہے،آئی ایم ایف یہی کہتا ہے کہ آپ کے خرچے بہت ہیں آمدن نہیں، آئی ایم ایف کہتا ہے آپ آمدنی بڑھائیں، آئی ایم ایف کہتا ہے آپ ٹیکس پیئرز بڑھائیں اور ریونیو کلیکشن ٹھیک کریں۔سلیم مانڈوی والا نے کہا کہ آئی ایم ایف کے مطالبات غلط نہیں ہوتے، پی آئی اے سمیت دیگر اداروں کے ایشوز کو حل کرنا ہوگا تاکہ آئی ایم ایف سے اچھا پیکیج لے سکیں۔
