پشاور (این این آئی)وزیراعلیٰ خیبرپختونخوا علی امین گنڈاپور کی زیر صدارت اجلاس میں معدنیات سے حاصل ہونے والی آمدنی سے متعلق بریفنگ دی گئی۔سرکاری حکام کے مطابق نئی مائننگ پالیسی تشکیل دینے اور آمدنی بڑھانے کیلئے شعبہ معدنیات کو جدید خطوط پر استوار کرنے کا فیصلہ کیا گیا ہے۔وزیراعلیٰ نے نئی پالیسی تشکیل دینے تک نئی مائننگ لیز کے اجرا پر پابندی کی ہدایت کی ہے۔حکام کے مطابق وزیراعلیٰ خیبرپختونخوا علی امین گنڈاپور نے محکمہ معدنیات سے جاری تمام لیز کی تفصیل بھی طلب کرلی ہے اور معدنی شعبے سے متعلق کمپنی کے قیام پر ہوم ورک مکمل کرنے کی ہدایت کی ہے۔انہوں نے کہا کہ محکمہ معدنیات کے امور کو پیپر لیس بنانے اور مکینیکل مائننگ پر کام کیا جائے، مائننگ لیز کے اجرا کیلئے ای بڈنگ کا نظام متعارف کرایا جائے۔علی امین گنڈاپور نے کہا کہ حکومت کو پورا حصہ نہ دینے والے لیز ہولڈرز یہاں مائننگ نہیں کرسکیں گے۔