کراچی(این این آئی) بی بی اے کے طالبعلم لاریب کو قتل کرنے والے ملزمان کی پہلی فوٹیج سامنے آگئی، سی سی ٹی وی فوٹیج کرائم سین کے قریب سے حاصل کی گئی ہے، جبکہ مقتول طالب علم کا موبائل فون بھی ایک مشتبہ شخص کے قبضے سے مل گیاہے۔تفصیلات کے مطابق کراچی کے علاقے کورنگی اللہ والا ٹاون میں بی بی اے کے طالبعلم لاریب کو قتل کرنے والے ملزمان کی سی سی ٹی وی فوٹیج سامنے آگئی۔لاریب کو قتل کرنے والے ملزمان کی پہلی فوٹیج سامنے آئی ہے، جس میں 2ملزمان کو موٹر سائیکل پر دیکھا جاسکتا ہے پیچھے بیٹھے ملزم نے نیلی شرٹ اور جینز پہن رکھی تھی جبکہ موٹر سائیکل چلانے والے ملزم نے بظاہرکالا جیکٹ پہن رکھا تھا۔سی سی ٹی وی فوٹیج کرائم سین کے قریب سے حاصل کی گئی ہے، پولیس کی جانب سے مزید فوٹیجز بھی حاصل کرلی گئی ہیں۔
حکام نے بتایاکہ ملزمان کی گرفتاری کے لیے جیوفینسنگ سمیت تمام وسائل کو بروئے کار لایا جارہا ہے جبکہ کورنگی پولیس نے جلد اہم پیش رفت ہونے کا دعوی بھی کردیا۔اس سے قبل کورنگی پولیس نے ایک مشتبہ شخص کو بھی حراست میں لیا تھا ، جس کے قبضے سے مقتول لاریب کا موبائل فون برآمد ہواہے ۔پولیس کے مطابق زیر حراست شہری نے بتایا کہ اسے لاریب کا موبائل فون گرا ہوا ملا تھا۔حکام نے کہا کہ زیر حراست شخص سے مزید تفتیش بھی کی جا رہی ہے۔یاد رہے دو روز قبل اسٹریٹ کرمنلز نے ڈکیتی کے دوران مزاحمت پرکرنے پر گولی مار کر قتل کردیا تھا۔
