لاہور ( این این آئی) بچیوں کو اغواء کر کے فروخت کرنے والے اغواء کار کو گرفتار کر کے اقبال ٹائون سے اغوا ہونے والی 3معصوم بچیوں کو بحفاظت بازیاب کروا لیا گیا ۔اے ایس پی ماڈل ٹائون رضوانہ ملک نے پرس کانفرنس کرتے ہوئے بتایا کہ کوٹ لکھپت پولیس نے کارروائی کر کے غریب مجبور بچیوں کو ورغلا کر اغوا کرکے بیچنے والا درندہ صفت ملزم کوگرفتار کیا ،تھانہ اقبال ٹائون میں بچیوں کے اغوا کا مقدمہ درج کر کے بذریعہ وائرلیس بچیوں کے متعلق رپورٹ دی گئی ۔ اغوا ہونے والی بچیوں میں 17 سالہ مہک، 16سالہ عیشا اور 12سالہ نشا شامل ہیں، بچیوں کو بحفاظت بازیاب کروانے اور ملزم کی گرفتاری کیلئے سپیشل ٹیم تشکیل دی گئی، ملزم کو جدید ٹیکنالوجی کی مدد سے وحدت روڈ نقشہ سٹاپ پر ٹریس کیا گیا، ملزم محسن نے تینوں بچیوں کو نقشہ سٹاپ گھر میں زبردستی بند کر رکھا تھا۔

اے ایس پی ماڈل ٹائون نے بتایا کہ اغوا ہونے والی تینوں بچیاں بھیکھے وال موڑ کچی آبادی کی رہائشی ہیں، محسن نامی ملزم بچیوں کو پیسوں کا جھانسہ دے کر اقبال ٹائون رضا بلاک سے ورغلا کر لیے گیا تھا۔ ملزم نے اعتراف کاکہ غریب، بے سہارا بچیوں کو اغوا کر کے دوردراز علاقوں میں لیجا کر پیسوں کے عوض فروخت کرتا تھا۔ ایایس پی رضوانہ ملک نے بتایا کہ ملزم ڈکیتی، چوری اغوا جیسے 49 سے زائد مقدمات میں سابقہ ریکارڈ یافتہ ہے، ملزم سے مزید تفتیش جاری ہے ، جلد دیگر ملزمان کو گرفتار کرکے کیفرکردار تک پہنچایا جائے گا۔