بہاولنگر(این این آئی)بہاولنگر میں پولیس اہلکار نے ساتھی کیساتھ مل کر خاتون کو مبینہ زیادتی کا نشانہ بنا ڈالا،ملزمان نے 25فروری کو خاتون کو نوکری کا جھانسہ دے کر بلایا اور نامعلوم مقام پر لے گئے جہاں انہوں نے خاتون کیساتھ مبینہ زیادتی کی اور اسکی ویڈیو بھی بنائی۔ترجمان پولیس کے مطابق خاتون سے مبینہ زیادتی کا مقدمہ درج کرلیا گیا ہے اور پولیس ملازم کو فوری طور پر معطل کر کے محکمانہ کارروائی کا بھی آغاز کردیا گیا ہے۔طارق کالونی کی رہائشی متاثرہ خاتون کے مطابق پولیس اہلکار نصیر اور وہ آپس میں قریبی رشتہ دار ہیں۔

ترجمان پولیس کے مطابق متاثرہ خاتون کو ملزم نصیر نے 25فروری کو نوکری کا جھانسہ دے کر بہاولنگر پولیس لائن بلایا اور اپنے ساتھی کے ساتھ مل کر خاتون کو گاڑی میں بٹھا کر نامعلوم مقام پر لے گئے اور تیزدھار آلہ کے زور پر زیادتی کا نشانہ بنایا اور بلیک میل کرنے کیلئے ویڈیو بھی بنائی، ملزم اہلکار نے دھمکی دی کہ کسی کو بتایا تو ویڈیوز وائرل کردیں گے۔ترجمان نے بتایا کہ حالت غیر ہونے پر ملزمان متاثرہ خاتون کو ستلج پارک پھینک کر چلے گئے۔پولیس ترجمان کے مطابق متاثرہ خاتون کی مدعیت میں ملزمان کیخلاف مقدمہ درج کرلیا گیا ہے، ملزم عدالت سے عبوری ضمانت پر ہے۔دوسری جانب ڈی پی او نصیب اللہ خان نے واقعے کا نوٹس لیتے ہوئے کہا کہ متاثرہ لڑکی کے ساتھ انصاف کے تقاضے پورے کیے جائیں گے۔