نئی دہلی (نیوز ڈیسک ) پاکستان کرکٹ بورڈ کے چیئرمین شہریار خان نے امید ظاہر کی ہے کہ پاکستان اور بھارت کے درمیان دسمبر میں کرکٹ سیریز کھیلی جائیگی اس حوالے سے مزید بات چیت آئندہ ہفتے دبئی میں آئی سی سی کے اجلاس میں ہوگی، بھارتی کرکٹ بورڈ کے سابق صدر جگ موہن ڈالیا کے انتقال پر اظہار افسوس کیلئے آمد پر میڈیا سے گفتگو کرتے ہوئے شہریار خان نے کہا کہ ہم دبئی میں اس دورے کیلئے بات چیت کرینگے اور بھارت اپنا پروگرام بتائے گا ، انہوں نے کہا کہ ہم اکتوبر کے آخر تک انتظار کرینگے جس کے بعد متبادل منصوبے پر غور ہوسکتاہے۔ چیئرمین کرکٹ بورڈ نے کہاکہ وزیراعظم نواز شریف بھی چاہتے ہیں کہ کرکٹ آگے بڑھے ، بہت سے سابق کرکٹرز نے بھی اس کی حمایت کی ہے جب ان سے پوچھا گیا کہ جاوید میانداد کا کہنا ہے کہ پاکستان زیادہ بھارت کے پیچھے نہ بھاگے تو شہریار خان نے کہا کہ ہم بھارت کے پیچھے نہیں بھاگ رہے لیکن ہم اس ماہ کے آخر تک بی سی سی آئی کا فیصلہ جاننا چاہتے ہیں تاکہ اگلا پروگرام بنا سکیں، جب ان سے پوچھا گیا کہ کیا پاکستان بھارت کےساتھ کرکٹ تعلقات کا بائیکاٹ کرسکتا ہے تو انہوں نے کہا کہ یہ آپشن بھی اپنی جگہ موجود ہے لیکن یہ پہلا آپشن نہیں۔
مزید پڑھئے:جنگجوؤں کا قبضہ- قندوز کیوں اہم ہے؟
