لاہور ( این این آئی) اسٹیٹ بینک آف پاکستان نے 75روپے کے نیلے اور سبز رنگ کے نوٹ سے متعلق وضاحت کردی۔ مرکزی بینک نے بذریعہ ایکس پیغام میں وضاحت جاری کی۔اسٹیٹ بینک نے واضح کیا ہے کہ 75روپے کے نیلے اور سبز رنگ کے بینک نوٹ قانونی ہیں۔مرکزی بینک نے ایکس پیغام میں وضاحت کرتے ہوئے مزید لکھا کہ پاکستان بھر میں تمام لین دین کے لئے 75روپے کے نیلے اور سبز رنگ کے نوٹ استعمال کیے جاسکتے ہیں۔

وضاحتی نوٹ میں مزید کہا گیا کہ اسٹیٹ بینک آف پاکستان کی جانب سے جاری کردہ یادگاری نوٹ سمیت تمام بینک نوٹ پاکستان میں تمام لین دین میں استعمال کیے جاسکتے ہیں۔یاد رہے کہ 75روپے کا سبز رنگ کا بینک نوٹ پاکستان کی آزادی کے 75سال مکمل ہونے کی یاد میں 14اگست 2022ء کو جاری کیا گیا۔ جبکہ 75روپے کا نیلے رنگ کا بینک نوٹ اسٹیٹ بینک کے قیام کے 75سال مکمل ہونے پر 04جولائی 2023ء کو جاری کیا گیا۔